دروستکردنی دەرمانێک تەمەن بە ڕێژەی 30% درێژ دەکات

ئاڤا نیوز

زانایان لە ئەوروپا دەرمانێکیان دروستکردووە، 30% تەمەن درێژ دەکاتو هاوکات تەندروستیش جێگیرتر دەکات، بەڵام تاقیکردنەوەی کۆتایی ماوە.

چیرۆکی سەرەکی: بەشێک لە زانایانی ئەوروپی تێکەڵەیەک لە دەرمان و چارەسەریان پەرەپێداوە کە بە سەرکەوتوویی تەمەنی مشکی تا 30% درێژکردووەتەوە، ئەمەش هەنگاوی یەکەمە پێش تاقیکردنەوەی لەسەر مرۆڤ کە دەکرێت چارەسەرێکی گرنگ و کاریگەر بێت بۆ پیر نەبوون.

ڕاگەیێنراوی فەرمی: بەپێی ڕاپۆرتێکی ماڵپەڕی "ساینس ئەلێرت"ـی زانستی، زانایان لە ئەوروپا تێکەڵەیەک لە دەرمانی دژە پیربوونیان لەسەر مشک تاقیکردووەتەوە و لە ئەنجامدا بە ڕێژەی نزیکەی 30% تەمەنیان درێژ بووە، هاوکات مشکەکان تەندروستیان جێگیرتر بووە، لەگەڵ کەمبوونەوەی هەوکردنی درێژخایەن و دواکەوتنی تووشبوون بە شێرپەنجە.

زانیاریی زیاتر: هەردوو جۆری دەرمان "ڕاپامایسین" و "ترامیتینب" کە بۆ چارەسەرکردنی چەندین جۆر نەخۆشیی شێرپەنجە بەکار دێن، تەنیا بەکارهێنانی دەرمانی ڕاپامایسین تەمەنی مشکەکانی بە ڕێژەی 17 بۆ 18% درێژکردووەتەوە، بەکارهێنانی ترامیتینیبیش تەمەنی مشکەکانی بە ڕێژەی حەوت بۆ 16% زیادکردووە، بەڵام بە تێکەڵکردنی هەردوو دەرمان، مشکەکان تەمەنیان بە ڕێژەی 26 بۆ 35% درێژ بووە.

لەلایەکی دیکەوە: بە وتەی زاناکان هەرچەندە چاوەڕوانی درێژبوونەوەی تەمەنی هاوشێوە لە مرۆڤدا ناکرێت وەک ئەوەی لە مشکدا دۆزیویانەتەوە، بەڵام ئەگەری هەیە ئەو دەرمانانەی لێکۆڵینەوەیان لەسەر کراوە یارمەتی مرۆڤەکان بدەن بۆ ئەوەی زیاتر تەندروست و بێ نەخۆشی بمێننەوە تا تەمەنی پیری.

بەگوێرەی ماڵپەڕی "ساینس ئەلێرت" بڕیارە بەم نزیکانە تاقیکردنەوەکانی ئەم تێکەڵە دەرمانە لە سەر مرۆڤدا دەست پێبکات، چونکە هەردوو دەرمانەکە پێشتر لە ئەمریکا و یەکێتیی ئەوروپا پەسەندکراون بۆ بەکارهێنانی لەلایەن مرۆڤ.