تووشبوویێکی دیکە بە تای خوێنبەربوون لە دەڤەری ڕاپەڕین دەستنیشانکرا

ئاڤا نیوز

وەزارەتی تەندروستی تووشبوویێکی نوێی تای خوێنبەربوونی ڕاگەیاند، ئەوەی تووشبووە پیاوێکی ئاژەڵداری دەڤەری ڕاپەڕینە.

وێنە گەورەکە: تای خوێنبەربوون نەخۆشیەکی ڤایرۆسی مەترسیدارە و لە ڕێگەی ئاژەڵی تووشبوو بە گەنە بە چەند ڕێگایەک دەگوازرێتەوە، زۆربەی ئەوانەی تووشی دەبن بەرکەوتنیان لەگەڵ ئاژەڵ و گۆشتی ئاژەڵ هەیە.

لێدوانی فەرمی: د. سامان بەرزنجی، وەزیری تەندروستی حکومەتی هەرێمی کوردستان بە ئاڤا میدیای وت، تووشبوویێکی دیکەی تای خوێنبەربوون ڕادەگەیێنین، پیاوێکی تەمەن 29 ساڵەی ناحیەی بۆسکین لە قەزای ڕانیەی دەڤەری ڕاپەرینە و ئاژەڵدارە و لە ڕێگەی ئاژەڵی تووشبوو بۆی گواستراوەتەوە، ئێستا لەژێر چاودێری چڕی پزیشکییە و تەندروستی جێگیرە.

لەلایەکی دیکەوە: تەها محەممەد، وتەبێژی تەندروستی ڕاپەڕین بە ئاڤا میدیای وت، ئەو کەسەی تووشبووە ئێستا لە نەخۆشخانەی شار لە سلێمانی چارەسەری وەردەگرێت.

باکگراوند: لەماوەی چوار مانگی ڕابردوودا چوار تووشبوو بە تای خوێنبەربوون لە هەرێمی کوردستان دەستنیشانکراوە، تەنیا یەکێک لە تووشبووەکان گیانی لەدەستداوە و ئەوانی دیکە چاک بوونەتەوە.