پێشنیازێکی نوێ لە واشنتنەوە بۆ تاران لەبارەی بەرنامە ئەتۆمییەکەی

ئاڤا نیوز

 

ڕۆژی شەممە ئەمریکا پێشنیازێکی بۆ ڕێککەوتن لەسەر بەرنامە ئەتۆمییەکەی ئێران بە بەرپرسانی ئەو وڵاتە داوە، ئێستا واشنتن چاوەڕێی وەڵامێکی ڕوون لە تاران دەکات.

 

وێنە گەورەکە: دانوستاندنە ناڕاستەوخۆکانی نێوان بەرپرسانی ئەمریکا و ئێران لەبارەی بەرنامە ئەتۆمییەکەی تاران بەردەوامە، تائێستا تاران پێداگری لەسەر بەردەوامی پیتاندنی یۆرانیۆم دەکات و ئەو بابەتە بە هێڵی سوور لە گفتوگۆکان دادەنێت. دەڵێت، پیتاندنی یۆرانیۆم بۆ مەبەستی ئاشتی بەکاردەهێنن.

 

لێدوانی فەرمی: عەباس عێراقچی، وەزیری دەرەوەی ئێران ڕایگەیاند، پێشنیازێکی ئەمریکای بۆ ئەگەری ڕێککەوتن لەسەر بەرنامە ئەتۆمییەکەی وڵاتەکەی پێگەیشتووە، بەبێ ئەوەی وردەکاری زیاتر سەبارەت بە پێشنیازەکە ئاشکرا بکات.

 

لەلایەکی دیکەوە: کارۆلین لیڤیت، وتەبێژی کۆشکی سپی هەواڵەکەی پشتڕاستکردووە و ڕایگەیاند، ستیف ویتکۆف، نێردەی دۆناڵد ترەمپ، بۆ ڕۆژهەڵاتی ناوەڕاست 'پێشنیازێکی ورد و قبوڵکراو'ـی پێشکەش بە ئێران کردووە بۆ گەیشتن بە ڕێککەوتنی ئەتۆمی.

 

زانیاریی بەدەستهاتوو: ماڵپەری ئەکسیۆس لە زاری بەرپرسێکی ئەمریکی بڵاویکردەوە، یەکێک لەو پێشنیازانەی لەلایەن عومانەوە پێشکەشی ئەمریکا کراوە، پەسەندکراوە، کە تێیدا داوای دامەزراندنی ناوچەیەکی تایبەت لە دەرەوەی ئێران بۆ پیتاندنی یۆرانیۆم بۆ مەبەستی مەدەنی بە سەرپەرشتی ئاژانسی نێودەوڵەتیی وزەی ئەتۆمی و ئەمریکا دەکات.