بەئامادەبوونی مەسرور بارزانی ئاهەنگی دەرچووانی زانكۆی ئەمریكی - كوردستان لە دهۆک بەڕێوەچوو

ئاڤا نیوز

بە ئامادەبوونی مەسرور بارزانی، سەرۆکوەزیرانی هەرێمی کوردستان و  سەرۆکی دەستەی ئەمیندارانی زانکۆی ئەمەریکی - کوردستان ئێوارەی ئەمڕۆ حەوتەمین خولی دەرچووانی زانكۆکە لە شاری دهۆك بەڕێوەچوو، ژمارەیەك بەرپرسی باڵای ناوخۆیی و عێراقی و نێودەوڵەتی ئامادەی بوون، هاوكات خانەوادە و كەسوكاری دەرچووانیش بەشداری ڕێوڕەسمەكە بوون.

وێنە گەورەکە: لە گەڕی ئەمساڵ، دەرچووانی هەر چوار كۆلێژی هونەر و زانستەكان، كارسازی، ئەندازیاریی و پەرستاری ئاهەنگیان گێڕا، كە بۆ جاری یەكەم قوتابیانی كۆلێژی پەرستاری زانكۆكە، وەك خولی یەكەمی دەرچووان بەشدار بوون و تێیدا 23 قوتابی بوونە خاوەنی بڕوانامەی بەكالۆریۆس لە پەرستاری. کە سەرجەمیان لەلایەن سەرۆكی دەستەی ئەمیندارانی زانكۆی ئەمریكی - كوردستان، بەخۆڕایی دەرفەتی خوێندنیان بۆ فەراهەم كرابوو.

ئەوەی پێویستە بیزانیت: تا ئێستا حەوت خولی دەرچووانی زانكۆكە تۆماركراوە، بەڵام شەشەمین ئاهەنگی دەرچووان سازکرا، بەو پێیەی ئاهەنگی دەرچووانی خولی ساڵی 2021، بەهۆی بڵاوبوونەوەی پەتای كۆرۆنا ساز نەكرا.

ژمارەكان وا دەڵێن: 68%ـی دەرچووانی ئەمساڵ، سكۆلەرشیپیان بۆ هاتووە. 12%ـی ئەو دەرچووانەی سكۆلەرشیپیان وەرگرتووە لە سكۆلەرشیپی نیمچەیی (ڕێژەیی) سوودمەند دەبن. 88%ـی ئەو دەرچووانەش فوول-سكۆلەرشیپ، واتە سكۆلەرشیپی تەواوەتیان بۆ هاتووە.

ئەمەش بزانە: خولی شەشەمی ئاهەنگی دەرچووان 93 دەرچووی زانكۆ لە چوار كۆلێژی جۆراوجۆر لەخۆدەگرێت، كە 23 لە دەرچووان، خولی یەكەمی دەرچووانی كۆلێژی پەرستارین. 27%ـی دەرچووانی 2025، یارمەتی داراییان پێدراوە.