کۆمیسیۆن لەڕێگەی ئاڤاوە شێوازی دەنگدانی ئاوارەکان ڕوون دەکاتەوە

ئاڤا نیوز

کۆمیسیۆنی باڵای هەڵبژاردنەکانی عێراق شێوازی دەنگدانی ئاوارەکان و دەنگدەرانی شنگال ڕوون دەکاتەوە و ئاماژە بۆ ئەوە دەکات، زیاتر لە 33 هەزار ئاوارە داتای بایۆمەترییان نوێکردووەتەوە.

وێنە گەورەکە: بڕیارە 2025-11-11، هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، کۆمیسیۆنیش لە ئامادەکارییەکانی بەردەوامە و بۆ ئەو مەبەستەش شێوازی دەنگدانی ئاوارەکان ڕووندەکاتەوە.

لێدوانی فەرمی: جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکان بە ئاڤا میدیای ڕاگەیاند: شێوازی دەنگدان بۆ ئاوارەکان بەگوێرەی یاسای هەڵبژاردنەکان ژمارەی 12ـی ساڵی 2018ـی هەموارکراو دەبێت، وەزارەتی کۆچ  و کۆچبەران و وەزارەتی بازرگانیش داتای ئاوارەکانیان بۆ دەستەبەر دەکەن.

شێوازی جێبەجێکردن: پەیوەست بە شێوازی دەنگدانی ئاوارەکان، جومانە غەلای ڕایگەیاند: مافی ئەوە بە ئاوارەکان دراوە ئەوانەی لەنێو کەمپەکان نیشتەجێن دەنگ بدەن لەسەر ئەو بازنەیەی کە لێیەوە ئاوارە بوونە، لە ڕێگەی کارتی بایۆمەتری دەنگدان، لەسەر کۆمیسیۆنیش پێویستە لەنێو کەمپەکان بنکەی دەنگدان بکاتەوە.

پەیوەست بە ئاوارەکانی شنگالیش، غەلای ڕایگەیاند، ئەوان لە شوێنی خۆیان لە ناوەوەو دەرەوەی کەمپەکان دەتوانن لە ڕێگەی کارتی بایۆمەترییەوە دەنگ بدەن لەسەر ئەو بازنەیەی کە لێیەوە ئاوارە بوونە.

ژمارەکان وادەڵێن: پڕۆسەی نوێکردنەوەی داتای ئاوارەکان لەنێو کەمپەکان بەردەوامە، 16 کەمپ لە پارێزگای دهۆک و پێنج کەمپ لە پارێزگای هەولێر هەن، ژمارەی ئەو ئاوارە دەنگدەرانەشی کە تاوەکو ئێستا خۆیان تۆمار کردووە و یان کارتی بایۆمەتریان نوێکردووەتەوە، دەگاتە زیاتر لە 33 هەزار کەس.