عێراق: لە ساڵێکدا زیاتر لە دوو هەزار و 700 کەس بە ڕووداوی هاتووچۆ گیانیان لەدەست داوە

ئاڤا نیوز

 

وەزارەتی پلاندانانی عێراق ڕایدەگەیێنێت، لە ساڵی 2024، زیاتر لە دوو هەزار 700 کەس بە ڕووداوەکانی هاتووچۆ گیانیان لەدەست داوە و ئاماژە بەوەشدەکات کە 78%ـی ڕووداوەکان هۆکارەکەی شۆفێر بووە.

 

وێنە گەورەكە: وەزارەتی پلاندانانی عێراق گرنگترین ئامار و داتاكان سەبارەت بە ڕووداوەکانی هاتووچۆ لە ساڵی 2024ـی بەراورد بە ساڵی 2023 ئاشکرا دەکات، بەپێی داتاکان ڕێژەی قوربانیانی ڕووداوەکانی هاتووچۆ 10٪ کەمیکردووە.

 

لێدوانی فەرمی: عەبدولزەهرە هینداوی، وتەبێژی فەرمی وەزارەتی پلاندانان، لە ڕاگەیێنراوێکدا کە وێنەیەکی دەست ئاڤا میدیا کەوتووە، ئاماژە بۆ ئەوە دەکات، لە ماوەی ساڵی 2024، لە سەرجەم پارێزگاکانی عێراق جگە لە هەرێمی کوردستان، 11 هەزار و 763 ڕووداوی هاتووچۆ تۆمارکراوە، لەو ژمارەیەش دوو هەزار و 103 ڕووداوی کوشندە بووە.

 

ژمارەکان وادەڵێن: ژمارەی گیانلەدەستدان بەهۆی ئەم ڕووداوانەوە گەیشتووەتە دوو هەزار و 719 کەس کە دوو هەزار و 235ـیان لە ڕەگەزی نێر بوون کە دەکاتە 82٪ـی کۆی گشتیی گیانلەدەستدان. بەراورد بە ساڵی 2023، ژمارەکە کەمیکردووە، ئەوکات سێ هەزار و 19 کەس گیانیان لەدەستدابوو.

 

- هەر لە 2024، بەهۆی ڕووداوەکانی هاتووچۆوە 11 هەزار و 896 کەس بریندار بووبوون، بەراورد بە ساڵی 2023، ڕێژەکە 3.4٪ دابەزیوە.