سەرۆکوەزیران بارزانی بەدواداچوون بۆ لافاوەکەی دهۆک دەکات

ئاڤا نیوز

سەرۆکوەزیران بارزانی پارێزگاری دهۆک ڕادەسپێرێت ئەوەی پێویست بێت بۆ پاراستنی گیانی هاونیشتمانیان بیکەن و ئامادەیی حکومەت بۆ هەموو هاوکارییەک دەردەبڕێت.

وێنە گەورەکە: شەپۆلێکی بارانبارینی چڕ چەند ناوچەیەکی باشووری کوردستانی گرتووەتەوە و یەکێک لەو شوێنانە شاری دهۆکە، بەهۆی دروستبوونی لافاو دوو کەس گیانیان لە دەست داوە و زیانێکی ماددی زۆریشی لێکەوتووەتەوە.

ڕاگەیێنراوی فەرمی: ڕاگەیاندنی پارێزگای دهۆک بڵاویکردووەتەوە، سەرۆکوەزیران بارزانی پەیوەندی بە عەلی تەتەر، پارێزگاری دهۆکەوە کردووە و ڕایسپاردووە "ئەوەی پێویست بێت بۆ پاراستنی گیانی هاووڵاتییان لە زووترین کاتدا بکرێت".

زانیاریی زیاتر: سەرۆکوەزیران بارزانی ئامادەیی حکومەتی هەرێمی کوردستانی بۆ هەر هاوکارییەکی خێرا و پێویست بۆ پاراستنی گیانی هاووڵاتیان لە دهۆک و پارێزگاکانی دیکە دووپاتکردووەتەوە.

لەلایەکی دیکەوە: ڕێبەر ئەحمەد، وەزیری ناوخۆ بەردەوام لەگەڵ پارێزگاری دهۆک لەسەر هێڵە بۆ کەمکردنەوەی زیانەکانی لافاوەکە و پاراستنی گیانی هاونیشتمانیان.

ئەوەی پێویستە بیزانیت: لە سنووری دهۆک لافاو زیانی بە چەند ناوچەیەک گەیاندووە، بەتایبەت کۆمەڵگەی دۆمیز و گەڕەکەکانی بەڕووشکێ و نەزارکێ. هەروەها بەیانی ئەمڕۆ لە تونێلی نەزارکێ لافاو دوو کەسی برد و تاوەکو ئێستا تەرمەکەیان نەدۆزراوەتەوە.