کۆمیسیۆن: مامەڵەکردن بەکارتی دەنگدانەوە سزای زیندانی لێدەکەوێتەوە

ئاڤا نیوز

کۆمسیۆنی باڵای سەربەخۆی هەڵبژاردنەکانی عێراق لەبارەی کڕین و فڕۆشتن بە کارتی دەنگدانەوە ڕوونکردنەوە دەدات و دەڵێت" بەبێ ئامادەبوونی دەنگدەر کارتەکەی هیچ بەهایەکی نییە و لەڕۆژی دەنگدان کاری پێناکرێت" .

وێنە گەورەکە: هاوشێوەی هەڵبژاردنەکانی ڕابردوو، لەگەڵ نزیکبوونەوەی وادەی هەڵبژاردنی خولی شەشەمی پەرلەمانی عێراق کە بڕیارە 2025-11-11، لەسەرتاسەری عێراق بەڕێوەبچێت، بەشێک لە لایەنە سیاسییەکانی بەشداربوو بەبێ گوێدان بە ڕێکارەکانی کۆمیسیۆن بەردەوامن لە پێشێلکاری پڕۆسەکە.

لێدوانی فەرمی: جومانە غەلای، وتەبێژی فەرمی کۆمیسیۆنی باڵای هەڵبژاردنەکانی عێراق ڕایگەیاند: کارتی دەنگدان بەبێ ئامادەبوونی دەنگدەر هیچ بەهایەکی نییە، چونکە لە ڕۆژی دەنگدان بەدەر لەڕێکارە تووندەکانی کۆمیسیۆن، ئامێرەکانی دەنگدان بەبێ پەنجەمۆری هەر 10 پەنجەی دەنگدەر کارتەکە ناخوێنێتەوە .

زانیاریی زیاتر: سەبارەت بە ئەو کەسانەی مامەڵەی کڕین و فڕۆشتن بەکارتی دەنگدانەوە دەکەن بەتایبەتی دوای ئەوەی دەنگۆی ئەوە بڵاوبووەتەوە کە نرخی هەر کارتێک گەیشتووەتە 400 هەزار دینار، غەلای دەڵێت "سزای زیندانی تاوەکو یەک ساڵ بەسەر هەر کەسێکدا دەسەپێنرێت ئەگەر کڕین و فڕۆشتن بەکارتی دەنگدانەوە بکات" .