ڤیزت کوردستان: کار لەسەر زیادکردنی هاتنی ژمارەی گەشتیار دەکەین

ئاڤا نیوز

سبەی پێنجشەممە، دامەزراوەی ڤیزت کوردستان کە تایبەتە بە کەرتی گەشتوگوزاری لە هەرێمی کوردستان، دەستپێکی کارەکانی ڕادەگەێنێت و دەیەوێت تا 2035 زیاتر لە 20 ملیۆن گەشتیار بهێنێتە کوردستان.

وێنە گەورەکە: ڤیزت کوردستان دامەزراوەیەکی ناحکومییە و ماوەی زیاتر لە ساڵیکە دامەزراوە، لە چوارچێوەی کەرتی گەشتوگوزار کار دەکات و مەبەست لێی نیشاندانی شوێنە سرووشتییەکانی کوردستانە بە جیهان.

لێدوانی فەرمی: هەڵمەت کیستەیی، وتەبێژی ڤیزت کوردستان بە ئاڤای ڕاگەیاند: لە ڕێوڕەسمێکدا بە ئامادەبوونی سەرۆکوەزیران مەسرور بارزانی، ڤیزت کوردستان بە فەرمی خۆی ڕادەگەێنێت، ئامانجی دامەزراوەکە بەرەوپێشبردنی کەرتی گەشتوزاری و ڕاکێشانی گەشتیاری نێودەوڵەتییە بۆ ناوچەکانی کوردستان.

بە گوتەی هەڵمەت کێستەیی، دامەزراوەی ڤیزت کوردستان هەوڵ دەدات تا ساڵی 2035 زیاتر لە 20 ملیۆن گەشتیار بهێنێتە هەرێمی کوردستان، هەروەها دامەزراوەکە هەلیکار بۆ زیاتر لە 500 کەس دەڕەخسینێت.

گۆشەیەکی دیکە: ڤیزت کوردستان کار بۆ دروستکردنی ژێرخانێکی پێویست بۆ کەرتی گەشتیاری لە کوردستان دەکات، هاوکات خزمەتگوزارییەکانی وەکو دابینکردنی هۆتێل، شوێنەکانی مانەوە و پلیت بڕین لەسەر وێبسایتێک پێشکەش بە گەشتیارانی بیانی دەکات.

ئەوەی پیویستە بیزانیت: ڤیزت کوردستان لەسەر چەند پرۆژەیەکی گەشتیاری کار دەکات، دیارترینیان پرۆژەی تەلەفریکی 10 کیلۆمەتری سۆرانە کە ساڵی 2027 تەواو دەبێت، پڕۆژەکە لە 10 وێستگە پێکدێت و هۆتێل و کافی، شوێنی دیکەی تایبەت لە خۆدەگرێت.