گومرگی کوردستان بۆ دەروازە سنوورییەکانی عێراق: ئێمە شەفافین، ئێوە گەندەڵن

ئاڤا نیوز 

 

گومرگی هەرێمی كوردستان وەڵامی دەروازە سنوورییەكانی عێراق دەداتەوە و دەڵێت، دەروازە سنوورییەكانی هەرێمی كوردستان بە یاسایی و شەفافی كاری خۆیان دەكەن، ئەوە دەروازە سنوورییەكانی عێراقن بەخراپ بەڕێوەبردن و گەندەڵی ناسراون.

 

چیرۆکی سەرەکی: ڕۆژی 3-6-2025 عومەر وائیلی، سەرۆکی دەستەی دەروازە سنوورییەکانی عێراق ڕاگەیاند،  بەهۆی توندکردنەوەی ڕێکارەکان لە دەروازە سنوورییەکانی عێراق و بازگە هاوبەشەکانیان لەگەڵ هەرێمی کوردستان، مانگی ڕابردوو داهاتیان بۆ 274 ملیار دینار بەرزبووەتەوە و هێرشی كردە سەر دەروازە سنوورییەكانی هەرێمی كوردستان و بە نایاسایی و ناشەفافی وەسفی كردن. 

 

ڕاگەیێنراوی فەرمی: بەڕێوەبەرایەتیی گشتیی گومرگی هەرێمی كوردستان ڕایگەیاند، خاڵە سنوورییەكانی هەرێمی كوردستان بەشێوەیەكی یاسایی كاری خۆیان دەكەن، حكومەتی هەرێمی كوردستان سیستمێكی شەفاف و سەردەمیانەی بۆ بەڕێوەبردنی دەروازە سنوورییەكان هەیە كە بەشێوەیەكی یاسایی داهاتەكان كۆ دەكرێنەوە، پێچەوانەی ئەوەی لە عێراقدا هەیە کە سیستمی دەروازە سنوورییەکان بە خراپی بەڕێوەبردن و گەندەڵی ناسراون."

 

بەڕێوەبەرایەتیی گشتیی گومرگی هەرێمی کوردستان ڕوونیشی دەكاتەوە، هێرشی دەستەی دەروازە سنوورییەکانی عێراق بۆسەر هەرێمی کوردستان بابەتێکی سیاسییە و بۆ پەردەپۆشکردنی ڕاستییەکانە.