ئەندامانی شاندی دانوستانکاری ڕۆژئاوای کوردستان لەگەڵ دیمەشق ئاشکرا دەکرێت

ئاڤا نیوز

لیژنەی دانوستانکاری سیاسیی کورد لەڕۆژئاوای کوردستان ناوی ئەو شاندەی بڕیارە سەردانی دیمەشق بکات و لەگەڵ دەسەڵاتدارانی سووریا کۆببێتەوە ئاشکرا دەکات.

وێنە گەورەکە: کۆنفڕانسی یەکڕیزیی هەڵوێستی کورد ڕۆژی 2025-04-26، لە شاری قامیشلۆی ڕۆژئاوای کوردستان بە بەشداری لایەنە سیاسیی و کەسایەتییە کوردییەکان، بەڕێوەچوو، لە کۆنفڕانسەکە، بڕیاردرا بۆ گفتوگۆ لەسەر مافە دەستوورییەکانی کورد و سیستمی لامەرکەزی بۆ ڕۆژئاوای کوردستان، شاندێکی هاوبەش و یەکگرتووی کورد سەردانی دیمەشق بکات.

ڕاگەیێنراوی فەرمی: ئەمڕۆ چوارشەممە 2025-06-04، لیژنەی دانوستانکاری سیاسی کورد بە بەشداریی مەزلوم عەبدی، فەرماندەیی گشتیی هێزەکانی سوریای دیموکرات، ڕوهڵات عەفرین و ئیلهام ئەحمەد،  ئەندامانی کۆنفڕانسی یەکڕیزیی هەڵوێستی کورد، کۆبوونەوە، دوابەدوای کۆبوونەوەکە ڕاگەیێنراوێکی بڵاوکردەوە و تێیدا ژمارە و ناوی ئەندامانی شاندی دانوستانکاری لەگەڵ دیمەشق ئاشکرا کرد.

زانیاریی زیاتر: ژمارەی ئەندامانی شاندەکە نۆ کەس دەبن، پێکهاتووە لە هاوسەرۆکان پەروین یوسف و محەمەد ئیسماعیل، بە ئەندامی ئەلدار خەلیل، ڕێحان لوقۆ، ئەحمەد سلێمان، سلێمان ئوسۆ، سەڵاح دەروێش، نەسرەدین ئیبراهیم، و فەیسەڵ یوسف.