چین دەرفەتی كار بۆ گەنجانی ئیدارەی ڕاپەڕین دەڕەخسێنێت

ئاڤا نیوز

كۆنسوڵخانەی گشتیی چین لە هەرێمی كوردستان، هێنانی كۆمپانیا چینییەكان بۆ دەڤەری ڕاپەڕین لەگەڵ بەرپرسانی ئیدارەكە تاوتوێ دەكات.

چیرۆكی سەرەكی: ڕۆژی چوارشەممە 2025-06-04، لیو جیون، کۆنسوڵی گشتیی چین لە هەرێمی کوردستان، سەردانی ئیدارەی سەربەخۆی ڕاپەڕینی كرد و لەلایەن هیوا قەرەنی، سەرپەرشتیاری ئیدارەی ڕاپەڕین و دلاوەر قوباد، جێگری سەرپەرشتیاری ئیدارەکە بۆ كاروباری هونەری پێشوازی لێكرا.

بابەتە ستراتیژییەكە: سەرپەرشتیاری ئیدارەی ڕاپەڕین داوای لە كۆنسوڵی گشتیی چین كرد، هانی كۆمپانیا چینییەكان بدات، پڕۆژەی جۆراوجۆر لەو دەڤەرە جێبەجێ بكەن، ئەوەش لەپێناو ڕەخساندنی دەرفەتی كار بۆ گەنجانی سنوورەكە.

لەلایەكی دیكەوە: لیو جیون، کۆنسوڵی گشتی چین لە هەرێمی کوردستان دووپاتی كردەوە، وڵاتەكەی بە بایەخەوە لە دەڤەری ڕاپەڕین دەڕوانێت و بەڵێنی بە بەرپرسانی ئیدارەكە دا داواكاری هێنانی كۆمپانیا چینییەكان بۆ ناوچەكە بگەیەنێت و زانیاریی پێویست لەمبارەیەوە كۆ بكاتەوە.