لە هەولێر بڕی بەنزینی حکومی زیاتر دەکرێت

ئاڤا نیوز

ئەمڕۆ حەوت تانکەری زیاتر بەنزینی حکومی بۆ هەولێر دابین دەکرێت و لە ژمارەیەکی زیاتری بەنزینخانە، بەنزینەکە بەردەست دەبێت.

وێنە گەورەکە:  بەگوێرەی ژمارەی دانیشتووان و ژمارەی ئۆتۆمبێل، ڕۆژانە لە ڕێگەی هەردوو پاڵاوگەی کار و لاناز، بڕێک بەنزین لە ڕێگەی تانکەرەوە بۆ پارێزگا و ئیدارە سەربەخۆکان دابین دەکرێت، هەر لیترێکی بە 750 دینار بە شوفێران دەدرێت.

لێدوانی فەرمی:  سەرچاوەیەک لە بەڕێوەبەرایەتیی نەوت و کانزاکانی هەولێر بە ئاڤای گوت: بەردەوام لە پێش جەژن خواست لەسەر بەنزینی حکومی زیاتر دەبێت، بۆیە دوای وەرگرتنی ڕەزامەندی وەزارەتی سامانە سروشتییەکان، ئەمڕۆ 30 تانکەری بەنزین بۆ پارێزگای هەولێر دابین کراوە، لەکاتێکدا ڕۆژانی دیکە 23 تانکەر بوو، ئەو بڕەی زیاد کراوە لەو بەنزینە وەرگیراوە کە بۆ یەکەم ڕۆژی جەژن دانرا بوو.

"بەنزینی حکومی پێشتر ڕۆژانە لە 20 بۆ 29 بەنزینخانە دابەشدەکرا، ئەمڕۆ لە 36 بەنزینخانە دابەشدەکرێت، ڕۆژانی دوای جەژنیش دابەشکردنەکە ئاسایی دەبێتەوە".

بۆچی گرنگە: زیادکردنی بڕی بەنزین، نۆرەی وەرگرتن کەمتر دەکاتەوە و زۆرترین هاونیشتمانی لێی سوودمەند دەبن.