لە دەستەی گەشتوگوزارەوە بۆ بنکە و شوێنە گەشتیارییەکان: ڕۆژانی جەژن دەبێت کراوە بن

ئاڤا نیوز

 

دەستەی گەشتوگوزار، شوێن و بنکە گەشتیارییەکان ئاگادار دەکاتەوە، کە دەبێت لە ڕۆژانی پشووی جەژن هەموویان کراوە بن و پابەندی ڕێنماییەکان بن.

 

وێنە گەورەکە: ساڵانە لە جەژن و بۆنەکان ژمارەیەکی زۆر گەشتیار دێنە هەرێمی کوردستان، بۆ ئەمساڵیش پیشبینی دەکرێت زیاتر لە 300 هەزار گەشتیار بێن. بۆ پێشوازی لەو گەشتیارانە، لایەنە پەیوەندیدارەکان و کەرتی تایبەت ئامادەکارییان کردووە.

 

لێدوانی فەرمی: ئیبراهیم عەبدولمەجید، گوتەبێژی دەستەی گەشتوگوزار بە ئاڤای گوت، "لە ڕۆژانی پشووی جەژن دەبێت هەموو شوێن و بنکە گەشتیارییەکان کراوە بن، هاوکات دەبێت پابەندی ڕێنماییەکان بن لە پێشکەشکردنی خزمەتگوزاری، پاکوخاوێنی، سەلامەتی و بەرزنەکردنەوەی نرخەکان. لە ڕێگەی چەند لیژنەیەکیش چاودێریان دەکرێت.

 

- هەشت ژمارەی پەیوەندی وەکو هێڵی گەرم کراوە دەبن، بۆ ئەوەی لەهەر ڕووداوێکی نەخوازراو گەشتیار پەیوەندی بکات، ئەم ژمارانە لە بازگەکان بە گەشتیاران دەدرێن.

 

ژمارەکان وادەڵێن: لە هەرێمی کوردستان زیاتر لە سێ هەزار بنکە و شوێنی گەشتیاری هەن، ئەمانە بەشێکن لە شوێنە گەشتیارییەکان: 

480 هۆتێل.
282 مۆتێل.
44 کۆمەڵگەی گەشتیاری.
20 گوندی گەشتیاری .
زیاتر لە 1000 ڕێستورانت و خواردنگەی خێرا.
نزیکەی 700 کافتریا.
28 شاری یاری.