سەندیكای پارێزەران: عێراق سزای بەكۆمەڵی مووچەخۆرانی كوردستان دەدات

ئاڤا نیوز

 

سەندیكای پارێزەرانی كوردستان، سەبارەت بە ڕاگرتنی مووچەی فەرمانبەرانی هەرێمی كوردستان لەلایەن حكومەتی عێراقەوە، ڕاگەیێنراوێكی بڵاو دەكردەوە و دەڵێ، "ئەو هەڵسوکەوتە نایاساییەی وەزارەتى دارایی عێراق سزادانى بەکۆمەڵى مووچەخۆرانى هەرێمى کوردستانە".

 

وێنە گەورەكە: وەزارەتی دارایی حكومەتی عێراق، بڕیاری ڕاگرتنی ناردنی مووچەی فەرمانبەرانی هەرێمی كوردستانی داوە، ئەمەش ناڕەزایی زۆری لە ئاستی سەركردایەتیی كورد و هاووڵاتیانی هەرێمی كوردستانی لێكەوتووەتەوە بەتایبەت كە حكومەتی عێراق، مووچەی فەرمانبەرەكانی خۆی چەند ڕۆژێك پێشخست و پێش هاتنی جەژنی قوربان دابەشی كرد، لەدوایین هەڵوێستیشدا ئەنجوومەنی وەزیرانی هەرێمی كوردستان ڕۆژی چوارشەممە ڕایگەیاند, لەمبارەیەوەیە نامەیەكی فەرمی ئاراستەی كۆمەڵگەی نێودەوڵەتی دەكات.

 

ڕاگەیێنراوی فەرمی: سەندیكای پارێزەرانی كوردستان ڕایگەیاند: وەزارەتی دارایی و حكومەتی عێراق، بەبێ ڕەچاوکردنى دەستوور و یاساى بودجە و بڕیارەکانى دادگاى فیدڕاڵ و بێباکانە و یەکلایەنە و بەشێوەیەکى نایاساییى بڕیاریان دا بە ڕاگرتن و وەستاندنى شایستە داراییەکان و مووچەى فەرمانبەران و خاوەن پێداویستیى تایبەت و کەسوکارى شەهیدان.

 

- ئەو هەڵسوکەوتە نایاساییەی وەزارەتى داراییى عێراق کە سزادانى بەکۆمەڵى مووچەخۆرانى هەرێمى کوردستانە، کە بەپێى دەستوور و یاسا هەمان ماف و ئیمتیازاتى مووچەخۆرانى بەشەکانى دیکەى عێراقیان هەیە، لەگەڵ پرەنسیپە یاساییەکان یەکناگرێتەوە.

 

- داواکارین حکومەتى فیدڕاڵ و وەزارەتى دارایی بەو بڕیارەى خۆیاندا بچنەوە و بە زووترین کات، مووچە و شایستە داراییەکانى فەرمانبەران و هەرێمى کوردستان بنێرن و نەکەونە ژێر گوشاری هیچ لایەنێک و ئەجێنداى گرووپى لە یاسادەرچوو.

 

- دیباجەى دەستوورى هەمیشەیى عێراق بەبیرى دەسەڵاتدارانى عێراق دەهێنینەوە، کە جێبەجێکردنى بڕگەکانى دەستوور زامنى یەکپارچەیى و یەکێتیی عێراقە.