تا کۆتایی ئەم مانگە ژمارەی سوودمەندان لە پرۆژەی ڕووناکی دەگاتە دوو ملیۆن کەس

ئاڤا نیوز

 

پڕۆژەی ڕووناکی لە سەرتاسەری هەرێمی کوردستان دەست بە جێبەجێکردنی کراوە، تاوەکو ئێستا زیاتر لە یەک ملیۆن هاووڵاتی لەم پڕۆژەیە سودمەند بوون.

 

وێنە گەورەکە: پڕۆژەی ڕووناکی، یەکێکە لە پڕۆژە ستراتیژییەکانی حکومەتی هەرێمی کوردستان، لە شارەکانی هەولێر، سلێمانی، دهۆک دەست بە جێبەجێکردنی کراوە، بەگوێرەی ئەو پلانەی بۆی دانراوە تاوەکو کۆتایی ساڵی 2026 کارەبای سەرتاسەری هەرێمی کوردستان دەبێتە 24 کاتژمێر.

 

ژمارەکان وادەڵێن: ژمارەی ئەو هاووڵاتیانەی لە کارەبای 24 کاتژمێری سوودمەند بوون، یەک ملیۆن و 100 هەزار کەسن.

-ژمارەی ئەو گەڕەکانەی کارەبای 24 کاتژمێریان بۆ دابین کراوە، 95 گەڕەکن.
-60 هەزار موڵکی بازرگانی کارەبای 24 کاتژمێری بۆ دابین کراوە.

 

ئەوەی پێویستە بیزانیت: بەگوێرەی ئەو بەرنامەیەی دانراوە تاوەکو کۆتایی ئەم مانگە ژمارەی سوودمەندانی کارەبای 24 کاتژمێری دەبێت بە دوو ملیۆن کەس.