لە هەردوو فرۆکەخانەی هەولێر و سلێمانی پێشوازی لە گەشتیاران دەکرێت

ئاڤا نیوز

لە چوار ڕۆژی جەژنی قوربان نزیکەی 350 گەشتی ئاسمانی لە هەردوو فرۆکەخانەی نێودەوڵەتیی هەولێر و سلێمانی دەکرێن، و پێشبینی هاتنی ژمارەیەکی زۆری گەشتیار دەکرێت بۆ شارەکانی هەرێمی کوردستان.

وێنە گەورەکە: پێشبینی دەکرێت لە پشووی جەژنی قوربان زیاتر لە 300 هەزار گەشتیار بێنە هەرێمی کوردستان، بەشێکی ئەو گەشتیارانە لە ڕێگەی هەردوو فرۆکەخانەی نێودەوڵەتیی هەولێر و سلێمانی سەردانی هەرێمی کوردستان دەکەن.

لێدوانی فەرمی: دیلان ڕەشاد، گوتەبێژی وەزارەتی گواستنەوە و گەیاندنی هەرێمی کوردستان بە ئاڤای گوت، لە هەموو جەژن و بۆنەکان لە هەردوو فرۆکەخانەی نێودەوڵەتیی هەولێر و سلێمانی پێشوازی لە گەشتیاران دەکرێت، ڕێکارەکانیش بەجۆرێک ڕێکخراون هەموو ئاسانکاریەک بۆ گەشتیاران کراوە.

زانیاریی زیاتر: بە گوتەی دیلان ڕەشاد، جگە لەو گەشتییارانەی لە دەرەوە دێن، بەشێکی گەشتیارانی باشوور و ناوەڕاستی عێراقیش لە ڕێگەی گەشتی ئاسمانییەوە دێنە هەرێمی کوردستان.

ژمارەکان وادەلێن: لە ماوەی چوار ڕۆژی جەژنی قوربان لە فرۆکەخانەی نێودەوڵەتیی هەولێر 308 گەشتی ئاسمانی هاتن و چوون دەکرێن، لە فرۆکەخانەی سلێمانیش 38 گەشتی ئاسمانی هاتن و چوون دەکرێن.