کرێملین: پووتین ئامادەیە چارەسەرێک بۆ بەرنامە ئەتۆمییەکانی ئێران بدۆزێتەوە

ئاڤا نیوز

 

کۆشکی کرێملین ڕایگەیاند: سەرۆکی ڕووسیا ئامادەیە دەستوەردان بکات لە دۆزینەوەی چارەسەر بۆ ناکۆکییەکانی نێوان ئێران و ئەمریکا لەسەر بەرنامە ئەتۆمییەکانی تاران. 

 

وێنە گەورەکە: بەرپرسانی واشنتن و تاران پێنج گەڕی دانوستانی ناڕاستەوخۆیان ئەنجامداوە، ئەمەش بە ئامانجی گەیشتنە ڕێککەوتنێک بۆ ئەوەی کۆتایی بە ئاڵۆزییەکانی نێوانیان بهێنن، لەسەر پرسی بەدەستهێنانی وزەی ئەتۆمی لەلایەن ئێرانەوە.

 

لێدوانی فەرمی: دیمیتری پیسکۆڤ، وتەبێژی کۆشکی کرێملین لە لێدوانێکی ڕۆژنامەوانیدا وتی، ئێمە هاوبەشییەکی نزیکمان لەگەڵ تاران هەیە و سەرۆک پووتین ئامادەیە ئەم هاوبەشییە بۆ یارمەتیدان لە چارەسەرکردنی کێشەی ئەتۆمی ئێران کەڵک وەربگرێت".

 

لەلایەکی دیکەوە: دۆناڵد ترەمپ دووشەممەی ڕابردوو ڕایگەیاند، ئیدارەکەی ڕێگە بە پیتاندنی یۆرانیۆم لە ئێران نادات، سەرەڕای پێداگری تاران لەسەر ئەوەی بەپێی پەیماننامەی قەدەغەکردنی چەکی ئەتۆمی مافی هەیە.

 

بۆچوونی لایەنی بەرامبەر: ئایەتوڵڵا خامنەیی، ڕێبەری باڵای ئێران ڕۆژی چوارشەممە ڕایگەیاندبوو: پێشنیازەکەی واشنتن دژی بەرژەوەندیی نەتەوەیی تارانە و دەستبەرداری پیتاندنی یۆرانیۆم نابن.