سەرۆکوەزیران بارزانی بەدواداچوون بۆ ئامادەکارییەکانی هەولێر دەکات

ئاڤا نیوز

سەرۆکوەزیران بارزانی بەدواداچوون بۆ ڕەوشی هەولێر و ئامادەکارییەکان دەکات بۆ کۆنترۆڵکردنی هەر ڕووداوێکی نەخوازراو بەهۆی ناجێگیریی کەشوهەوا، پارێزگاریش ڕادەسپێرێت ئەوەی پێویست بێت بۆ پاراستن و سەلامەتی گیانی هاووڵاتیان بیکەن.

وێنە گەورەکە: لە کاتژمێر 1:00ـی دوانیوەڕۆی ئەمڕۆوە بارانێكی به‌خوڕ و ته‌زره‌ی زۆر شاری هەولێر و دەوروبەری گرتووەتەوە، بۆیە مەترسی دروستبوونی لافاو هەیە. چاوەڕوان دەکرێت نالەباری کەشوهەوا تاوەکو کاتژمێر 06:00ی ئێوارە بەردەوام بێت.

ڕاگەیێنراوی فەرمی: سەرۆکوەزیران بارزانی پەیوەندی بە ئومێد خۆشناو، پارێزگاری هەولێر کردووە و بەدواداچوونى بۆ ڕەوشەکە و ئامادەکارییەکان کردووە بۆ کۆنترۆڵکردنی هەر ڕووداوێکی نەخوازراو.

زانیاریی زیاتر: سەرۆکوەزیران فەرمانى کردووە ئەوەی پێویست بێت بۆ پاراستن و سەلامەتی گیانی هاووڵاتیان بکرێت و ئامادەیی حکومەتی بۆ هەر هاوکارییەکی خێرا و پێویست دووپاتکردووەتەوە. 

خاڵە ئەرێنییەکان: پارێزگاری هەولێر سەرۆکوەزیرانی دڵنیاکردووەتەوە لەوەی ئامادەکاری تەواو کراوە و سەرجەم فەرمانگە پەیوەندیدارەکان لە ئامادەباشیدان.

تیشکى خستووەتە سەر ئەو پلان و بەرنامە و پڕۆژانەش کە  لە ڕابردوودا بۆ بەرەنگاربوونەوەی مەترسییەکانی دروستبوونی لافاو و هۆکارەکانى  جێبەجێکراون، بەهۆیانەوە تا ئاستێکی زۆر مەترسیی دروستبوونی لافاو کەمبووەتەوە.