سێ کەس بە تۆمەتی دزینی محاویلەی کارەبا دەستگیر کران

ئاڤا نیوز

 

لە گوندێکی ناحیەی ڕۆڤیا ئاسایش سێ کەسی دەستگیر کردووە سەرقاڵی دزینی گۆڕەری کارەبا (محاویلە) بوون، بەوتەی بەڕێوەبەری ناحیەی ڕۆڤیا، تۆمەتباران دانیان بەوە ناوە لە ڕابردوو دوو محاویلەی دیکەیان دزیووە.

 

چیرۆکی سەرەکی: ماوەیەک دیاردەی دزینی گۆڕەری کارەبا لە سنووری ناحیەی ڕۆڤیای قەزای بەردەڕەش سەریهەڵداوە، ئاسایش و پۆلیس بە وردی بەدواداچوونییان کردووە، شەوی ڕابردوو دزەکان سەرقاڵی خەڵکی ناوچەکەیان بەهۆی جەژنی قوربانەوە بە دەرفەت زانییوە، لە گوندی (بەردەزیوو) بە ئۆتۆمبێلێکی جۆری مازدا سەرقاڵی لێکردنەوەی محاویلەیەکی کارەبا دەبن، ئاسایشیان لێ ئاگادار کراوەتەوە، بەڵام ئەو کاتە دەستگیرنەکراون و هەڵاتوون.

لێدوانی فەرمی: مەنهەل مەوفەق، بەڕێوەبەری ناحیەی ڕۆڤیا بە ئاڤا میدیای وت، دوای ئەوەی ئاسایش گەیشتووەتە شوێنەکە تۆمەتبارەکان هەڵاتوون، بەڵام کەسێک چووەتە ئاسایش و وتویەتی ئەو ئۆتۆمبێلە هی منە و سێ هاوڕێم لێیان وەرگرتووم وتوویانە بۆ جەژن دەچین پێداویستی دەکڕین، بەڵام فێڵیان لێ کردووم و نەمزانیووە ئۆتۆمبێلەکەن بۆ دزیکردن بەکار دەهێنن.

 

-بەڕێوەبەری ناحیەی ڕۆڤیا دەڵێت: لەو ڕێگایەوە سێ کەسەکە دۆزرانەوە و دەستگیر کران و لەبەردەم ئاسایش دانیان بەوە ناوە لەماوەی ڕابردوو دوو محاویلەی دیکەیان دزیووە.