هۆشداریی دەدرێت بە گەشتیاران لە مەلەکردن لە ڕووبار و زێیەکان

ئاڤا نیوز

 

بەڕێوەبەرایەتیی بەرگری شارستانیی هەرێمی کوردستان، هوشداریی بە هاونیشتمانیان و گەشتیاران دەدات خۆیان بە دووربگرن لە مەلەکردن لە ڕووبار و زێیەکان تاوەکو بە دووربن لە ڕووداوی دڵ تەزێن. 

 

وێنە گەورەکە: ساڵانە لە جەژن و بۆنەکاندا گەشتیاران و هاونیشتمانیان بەمەبەستی بەسەربردنی پشووەکانیان سەردانی ناوچە گەشتیارییەکان دەکەن، بۆ ئەمساڵیش پێشبینی دەکرێت زیاتر لە 300 هەزار گەشتیار ڕوو لە کوردستان بکەن کە زۆرینەیان لە باشوور و ناوەڕاستی عێراقەوە دێن.

 

لێدوانی فەرمی: سەرکەوت کاڕەش، گوتەبێژی بەڕێوەبەرایەتیی گشتیی بەرگریی شارستانیی هەرێمی کوردستان بە ئاڤای گوت: زێ و ڕووبارەکانی هەرێمی کوردستان خێراییان زۆرە و ئاوەکانیان ساردە و قوڵیان دیار نییە بۆیە بە هیچ جۆرێک بۆ مەلەوانەی نابن و مەترسیدارن.

- داوا لە هاونیشتمانیان و گەشتیاران دەکەین، بەهیچ جۆرێک لە زێی و ڕووبارەکان مەلەوانی نەکەن، تەنیا لەو شوێنانە نەبێت کە بۆ مەلەوانی ڕێگەپێدراون و ڕزگارکەری بۆ دانراوە، دەبێت لەو شوێنانەش بەرگی سەلامەتی بەکاربهێنن.

 

لەلایەکی دیکەوە: زانیار عومەر، گوتەبێژی بەرگریی شارستانیی هەڵەبجە، بە ئاڤای گوت: داوا لە گەشتیاران دەکەین دوور بکەنەوە لە سەرکێشی کردن و بەهیچ شێوەیەکیش ئەو بەلەمانە بەکارنەهێنن کە مەرجی سەلامەتییان تێدا نییە.