چاودێری بازرگانی سۆران: هەر شوێنێک سەرپێچی بکات ناوی بڵاودەکەینەوە

ئاڤا نیوز

 

بەڕێوەبەرایەتیی چاودێریی بازرگانیی سۆران، دوکان و مارکێت و سوپەرمارکێتەکان ئاگاداردەکاتەوە، هەر شوێنێک سەرپێچی بکات ناوەکەی ئاشکرا دەکرێت و بڵاودەکرێتەوە.

 

وێنە گەورەکە: لیژنەی پشکنین و چاودێری بازاڕ لە سۆران سەردان و چالاکییەکانیان بەبۆنەی هاتنی جەژن و هاتنی پشووی هاوینە زیاتر کردووە، چونکە ژمارەیەکی زۆر لەو گەشتیارانەی دێنە هەرێمی کوردستان ڕوو لە ناوچە گەشتیارییەکانی سنوری ئیدارەی سەربەخۆی سۆران دەکەن.

 

لێدوانی فەرمی: وەفا سەعیدخان دۆلەمەری، سەرۆکی لیژنەی پشکنین و چاودێری بازاڕ لە بەڕێوەبەرایەتیی چاودێریی بازرگانیی سۆران بە ئاڤای گوت، هەر شوێنێک سەرپێچی ڕێنماییەکان بکات ڕێکاری لە بەرامبەر دەگرینەبەر و ناوەکەشی بڵاودەکەینەوە.

 

ژمارەکان وادەڵێن: لە پێنج مانگی یەکەمی ئەمساڵ ، لیژنەی پشکنین و چاودێری بازاڕ لە سۆران هەزار و 529 سەردانی کردووە، دەستی بەسەر 15 تۆن کەلوپەلی خراپ و ماوەبەسەرچوو داگرتووە، 125 شوێن بەهۆی سەرپێچی سزادراون بەمشێوەیە:

- پێبژاردن 33 شوێن.
- بەڵێننامە 75 شوێن.
- داخستن 17 شوێن.