هەڵمەتی كوتانی قوتابیانی سەرەتایی دەستپێدەكات

ئاڤا نیوز

وەزارەتی تەندروستی عێراق هەڵمەتی پێکوتەی سورێژە بۆ هەشت ملیۆن قوتابی قۆناغی سەرەتایی دەستپێدەکات، هەڵمەتەکە هەرێمی کوردستانیش دەگرێتەوە.

لێدوانە فەرمییەکان: ماجد شەنگالی، سەرۆکی لیژنەی تەندروستی و ژینگە لە پەرلەمانی عێراق ڕایگەیاند: وەزارەتی تەندروستی هەڵمەتی کوتانی قوتابیانی سەرەتایی دژی سورێژە لە سەرجەم قوتابخانەکانی عێراق دەستپێدەکات.

لەلایەکی دیکەوە: سەرکار سوورچی، گوتەبێژی وەزارەتی تەندروستی حکومەتی هەرێمی کوردستان بە ئاڤا نیوزی گوت: ئەم هەڵمەتە هەرێمی کوردستانیش دەگرێتەوە و قوتابیانی سەرەتایی پۆلی یەک تا شەش پێکوتەی سورێژە وەردەگرن.

ئەوەی پێویستە بیزانیت: حکومەتی عێراق بۆ هەڵمەتی پێکوتەی سورێژە 10 ملیار دیناری تەرخانکردووە، هەڵمەتەکەش هەشت ملیۆن قوتابیی لە عێراق و هەرێمی کوردستان دەگرێتەوە.