ئاگر لە کەمپێکی ئاوارەکانی زاخۆ دەکەوێتەوە

ئاڤا نیوز

دوانیوەڕۆی ئەمڕۆ یەکشەممە، بەهۆی شۆڕتی کارەباوە ئاگر لە سێ کابینەی مانەوەی ئاوارەکانی کەمپێکی زاخۆ کەوتەوە، تەنیا کەل و پەلەکان سووتاون، بەڕێوەبەری بەرگریی شارستانی زاخۆ دەڵێت، "زیانی گیانی نەبووە."

چیرۆکی سەرەکی: کاتژمێر 04:13 خولەک، ئاگر لە کەمپی دەرکار لە سنووری ئیدارەی سەربەخۆی زاخۆ کەوتەوە، بەهۆیەوە سێ کابینەی مانەوە سووتان کە وەک کۆگایەکی، خێزانەکانی دانیشتووی ئەو کەمپە بەکار هاتوون.

لێدوانی فەرمی: جەمال هەسن، بەڕێوەبەری بەرگریی شارستانی زاخۆ بە ئاڤای گوت، ئاگرەکە نیو کاتژمێر بەردەوامی هەبووە، خۆشبەختانە زیانی گیانی نەبووە و دانیشتووانی کەمپەکە سەلامەتن، بەهۆی درەنگ ئاگادارکردنەوە تیمەکانی بەرگریی شارستانی، ئاگرەکە تەشەنەی کردووە بۆ دوو کابینەی دیکە، بەڵام هەمووی کۆنترۆل کراوە.

ئەوەی پێویستە بیزانیت: کەمپی دەرکار ساڵی 2014 دروستکراوە، زیاتر لە هەزار کابینە و چادر لەخۆ دەگرێت، 150 بۆ 200 خێزانی ئاوارە تێیدا دەحەوێنەوە.

باکگراوند: لە سنووری ئیدارەی سەربەخۆی زاخۆ چوار کەمپی ئاوارەکان هەن کە بریتین لە دەرکار، چەمشکۆ، بێرسڤ1 و بێرسڤ2، زۆربەی نیشتەجێبووەکانی ئەو کەمپانە لە بنەڕەتدا خەڵکی شنگالن، بەڵام هەندێکی دیکەی تێدایە کە خەڵکی نەینەوا یان ڕۆژئاوای کوردستانن.