سەرۆک بارزانی جەخت لە پاراستنی قەوارەی دەستووری هەرێمی کوردستان دەکاتەوە

ئاڤا نیوز

سەرۆک بارزانی لە دیدارێکدا لەگەڵ باڵیۆزی ئیتاڵیا لە عێراق، باس لە دواین پیشهاتەکانی پرۆسەی سیاسی دەکات، جەختیش لە پاراستنی قەوارەی دەستووری هەرێمی کوردستان دەکاتەوە.

ڕاگەیێنراوی فەرمی: ڕۆژی سیشەممە 19ی ئاداری 2024 لە سەڵاَحەدین، سەرۆک بارزانی، پێشوازی لە  ماوریتزیۆ گرێگانتی باڵیۆزی ئیتاڵیا لە عێراق و شاندێکی یاوەری کرد، باڵیۆزی ئیتاڵیا لە عێراق خۆشحاڵی خۆی بە دووبارە دیداری لەگەڵ سەرۆک بارزانی دەربڕی و پیرۆزبایی جەژنی نەورۆزی لە سەرۆک و تەواوی گەلی کوردستان کرد، سەرۆک بارزانی رایگەیاند کە نەورۆز بۆ کورد هێمای سەرکەوتنە بەسەر تاریکیدا بە داگیرساندنی بلێسەی ئازادی و ئاشتی.

ئەوەی پێویستە بیزانیت: لە کۆبوونەوەکەدا دوایین پێشهاتەکانی پڕۆسەی سیاسی و هەڵبژاردنەکانی پەرلەمانی کوردستان تاوتوێ کران، سەبارەت بە راگەیێنراوی مەکتەبی سیاسیی پارتیش بۆ بەشدارینەکردن لە هەڵبژاردن، سەرۆک بارزانی ڕایگەیاند پارتی دیموکراتی کوردستان هەمیشە بەدوای دۆزینەوەی رێگەچارە بووە بۆ فەراهەمکردنی سەقامگیری وڵات و چەسپاندنی دیموکراسی بەگوێرەی بڕگەکانی دەستووری ساڵی 2005ی عێراق.

بابەتی ستراتیژی: سەرۆک بارزانی جەختی لە پاراستنی قەوارەی دەستووری هەرێمی کوردستان و سەرجەم مافە ڕەواکانی گەلی کوردستان کردەوە، چونکە قەوارەکە لە دەستووردا چەسپێنراوە و لە ئەنجامی خەباتی دوورودرێژ و بەردەوام هاتووەتەدی.

چارەسەر: باڵیۆزی ئیتاڵیا لە عێراق تێگەیشتنی تەواوی خۆی بۆ دۆخەکە دەربڕی، دواتریش هەردوولا جەختیان لە دۆزینەوەی چارەسەرێک لەسەر بنەمای دیموکراسی و سیستەمی فیدڕالیدا کردەوە.