سەرۆککۆماری عێراق: بەهۆی گۆڕانی ئاو و هەواوە ئاوی دیجلە و فوڕات دابەزیوە

ئاڤا نیوز

 

سەرۆککۆماری عێراق ڕایگەیاند، عێراق ڕووبەڕووی ئاڵنگارییەکی گەورە بووەتەوە بەهۆی کەمبوونەوەی ئاوەکانی ڕووبارەکانی دیجلە و فوڕات لەئەنجامی گۆڕانی ئاو  و هەواوە کە کاریگەریی کردووەتە سەر ئاستی بەرهەمی کشتوکاڵی و ناوخۆیی.

 

وێنە گەورەکە: سێیەمین کۆنفرانسی نەتەوە یەکگرتووەکان بۆ ئۆقیانووسەکان لە شاری نیسی فەرەنسا بەڕێوەدەچێت، د. لەتیف ڕەشید، سەرۆککۆماری عێراق یەکێکە لە بەشداربووانی کۆنفرانسەکە و تێیدا وتارێکی پێشکەش کرد.

 

ڕاگەیێنراوی فەرمی: د. لەتیف ڕەشید، سەرۆککۆماری عێراق ڕایگەیاند: ئاستی هەردوو ڕووباری دیجلە و فوڕات لە عێراق کەمبووەتەوە، بەهۆی چەند هۆکارێکەوە لەوانە گۆڕانی ئاو و وهەوا، نەبوونی سیاسەتێکی یەکگرتووی ئیداری و یاسایی بۆ ڕووبارە سنووربەزێنەکان، هەروەها دابەزینی رێژەی بەردانەوەی ئاوی عێراق لە وڵاتانی دراوسێیەوە، بووەتە هۆی زیادبوونی ئاوارەبوونی ناوخۆیی و دەرەکی و دابەزینی بەشداریکردنی بەرهەمی کشتوکاڵی لە داهاتی ناوخۆیی و گشتییدا.

 

- د. لەتیف ڕەشید لە درێژەی قسەکانیدا وتی: پێویستە ئۆقیانووسەکان وەک میراتێکی مرۆیی مامەڵەیان لەگەڵدا بکرێت، بەشداریی عێراق لەم کۆنفڕانسە لە سۆنگەی گرنگیدانییەتی بە کاری هاوبەش بۆ پاراستنی ژینگە، ئێمە نیگەرانین لە پیسبوونی ژینگە ئاوییەکانمان، ئۆقیانووسەکان بۆ هەندێک لە وڵاتان سەرچاوەی ژیانکردنە.

 

 زانیاریی زیاتر: سەرۆککۆماری عێراق داوای فراوانکردنی هاوبەشیی کاریگەر لە نێوان حکومەتەکان، کۆمەڵگەی مەدەنی، کەرتی تایبەت و دامەزراوە توێژینەوەکان کرد و داوای ئەوەشی کرد کە پشتیوانی دارایی داهێنەرانە و بەردەوام بۆ پاراستنی ئۆقیانووسەکان هەبێت، هەروەها هەماهەنگی و هاوکاریکردنی یەکتری بۆ گەیشتن بە رێککەوتن لەسەر ئاو، ڕووبار، و دەریاچەکان کە خزمەت بە بەرژەوەندی هەمووان بکات.