پرسی بڕینی مووچەی فەرمانبەرانی کوردستان دەبرێتە ئەنجوومەنی ئاسایشی نەتەوەیەکگرتووەکان

ئاڤا نیوز

 

دوای ئەوەی حکومەتی عێراق بەبێ بوونی هیچ پاساوێکی یاسای مووچە و شایستەی دارایی فەرمانبەرانی هەرێمی کوردستانی بڕی، ئەمڕۆ لە ئەنجوومەنی ئاسایشی نەتەوە یەکگرتووەکان کۆبوونەوەیەکی تایبەت بە دۆخی عێراق بەڕێوەدەچێت و یەکێک لە تەوەر و باسەکان ناکۆکییەکانی نێوان هەولێر و بەغدا دەبێت. 

 

وێنە گەورەكە: بڕیاری ڕاگرتنی مووچەی تەواوی ئەمساڵ لەلایەن وەزارەتی دارایی عێراق، کاردانەوەی تووندی لە ناوخۆی کوردستان و دەرەوە لێ کەوتووەتەوە، بەشێک لە لایەنە سیاسییەکانی عێراق بڕیارەکە بە پێشیلی دەستوور و بانگەشەی هەڵبژاردن نەو دەبەن.

 

زانیاریی زیاتر: بڕیارە ئەمڕۆ لە نەتەوەیەکگرتووەکان باس لە دۆخی عێراق و پرسی مووچەی هەرێمی کوردستان بکرێت. دکتۆر محەممەد ئەلحەسان، نوێنەری تایبەتی سکرتێری گشتی نەتەوەیەکگرتووەکان بۆ عێراق و سەرۆکی نێردەی یونامی کورتەیەک لەسەر بارودۆخی عێراق و یونامی پێشکەش دەکات.

 

ئەوەی پێویستە بیزانیت: بە بڕیارێکی سیاسی و بەبێ بوونی هیچ پاساوێکی یاسایی ناردنی مووچەی فەرمانبەران و خانەنشیشانی هەرێمی کوردستان لەلایەن بەغداوە ڕاگیراوە، سەرەڕای ئەوەی حکومەتی هەرێمی کوردستان هەموو ئەرکەکانی سەرشانی بەجێگەیاندووە، لە ڕادەستکردنی نیوەی داهاتی ناوخۆ و ناردنی میزان موڕاجەعە و لیستی مووچە بە بێ هیچ کێشییەک و کەموکورتییەک، ئەمەش بۆ ئەوەبوو کە پێش جەژنی قوربان مووچەی مانگی پێنجی مووچەخۆران دابەشبکرایە، بەڵام وەزارەتی دارایی عێراق مووچەی فەرمانبەرانی عێراقی دابەشکرد و بڕیاری لەسەر ناردنی مووچەی بۆ هەرێمی کوردستان نەدا.

 

ڕاگەیێنراوی فەرمی: یونامی ڕایگەیاند، ڕۆژی سێشەممە، 10-06-2025، ئەنجوومەنی ئاسایشی نەتەوەیەکگرتووەکان کاتژمێر 5ی ئێوارە بە کاتی کوردستان، دانیشتنێک سەبارەت بە دۆخی عێراق سازدەکات.