وەزارەتی سامانە سرووشتییەكان: نەوتی كەسانی دیكە بەناوی نەوتی عێراقەوە دەفرۆشرێت

ئاڤا نیوز

وەزارەتی سامانە سرووشتییەكانی حكومەتی هەرێمی كوردستان ئاشكرای دەكات، حكومەتی عێراق نەوتی كەسانی دیكە بە ناوی نەوتی عێراقەوە دەفرۆشێت، ئەوەش خزمەتی بەرژەوەندیی ئەوانی دیکە دەكات، لەجیاتی خزمەتكردنی عێراق و گەلەكەی.

وێنە گەورەكە: لە ڕۆژی 5ـی ئەم مانگە، وەزارەتی سامانە سرووشتییەکانی هەرێمی كوردستان، وەڵامی تۆمەتەکانی وەزارەتی نەوتی فیدراڵی دایەوە، گوایە حكومەتی هەرێمی كوردستان مەبەستی نییە هەناردەی نەوت لەڕێگەی سۆمۆ دەستپێبكاتەوە، وەزارەتی سامانە سرووشتییەكان بە بەڵگەوە سەلماندی كە هەرێمی كوردستان پابەندی سەرجەم خاڵ و بڕگەكان بووە بۆ دەستپێكردنەوەی هەناردەكردنەوەی نەوت، ئەوە حكومەتی عێراقە كە ماوەی چەندین ساڵە بە ئەنقەست كۆسپ و بەربەست لەبەردەم مافە دەستووریی و فیدراڵییەكانی هەرێمی كوردستان دادەنێت.

ڕاگەیێنراوی فەرمی: وەزارەتی سامانە سرووشتییەكان لە ڕاگەیێنراوێكی فەرمیدا ڕایدەگەیەنێت، حكومەتی فیدراڵی نەوتی دیکە تێکەڵ بە نەوتی عێراق دەکات و خزمەتی بەرژەوەندییەکانی ئەوانی تری پێ دەكات، لە جیاتی خزمەتکردنی عێراق و گەلەکەی.

دووپاتیشی دەكاتەوە، هەرێمی كوردستان پابەندی هەموو ئەركەكانی بووە، سەرەڕای پابەند نەبوونی لایەنی بەرامبەر.

خاڵە نەرێنییەكان: بەپێی ڕاگەیێنراوەكەی وەزارەتی سامانە سرووشتییەكان، ئەو سیاسەتەی بەغدا زیانی بە ناوبانگی نەوتی عێراق لە ئاستی جیهانیدا گەیاندووە.