ڕۆژنامەیەکی ئەمریکی: ئیسرائیل بەمزووانە هێرش دەکاتە سەر ئێران

ئاڤا نیوز

ڕۆژنامەیەکی ئەمریکی بڵاویکردەوە، بەرپرسانی ئەمریکا و ئەوروپا ڕایانگەیاندووە، ئیسرائیل خۆی ئامادە دەکات بۆئەوەی بەمزووانە هێرش بکاتە سەر ئێران.

وێنە گەورەکە: تا دێت گرژییەکانی نێوان ئەمریکا لەلایەک و ئیسرائیل لەلایەکی دیکەوە لەگەڵ ئێران زیاتر دەبن، بۆ ئەم مەبەستەش ئەمریکا چەند ڕێکارێکی گرتووەتەبەر، بەتایبەت کشانەوەی هەندێک دیپلۆماتکار و کارمەندی باڵیۆزخانەکەی لە بەغدا و چەند وڵاتێکی دیکەی ناوچەکە.

زانیاریی بەدەستهاتوو: ڕۆژنامەی نیویۆرک تایمزی ئەمریکی بڵاویکردووەتەوە، ئەم هەنگاوە ململانێکان لە ڕۆژهەڵاتی ناوەڕاست زیاد دەکات و دەبێتە بەربەست یان دواخستنی هەوڵەکانی ئیدارەی دۆناڵد ترەمپ بۆ گەیشتن بە ڕێککەوتنێک بۆ بڕینی ڕێگای ئێران بۆ دروستکردنی بۆمبی ئەتۆمی.

زانیاریی زیاتر: هێشتا ڕوون نییە ئیسرائیل تا چ ئاستێک هێرشەکەی فراوان دەکات، بەڵام زیادبوونی گرژییەکان دوای چەند مانگێک دێت کە بنیامین نەتانیاهۆ بە ترەمپی ڕاگەیاند، چاوەڕێی ئەو کاتە دەکەن کە ئێران تێیدا لاواز دەبێت.

لەلایەکی دیکەوە: چەند مانگێک لەمەوبەر ترەمپ لەدوا ساتەکاندا ڕێگری لە هێرشی ئیسرائیل بۆ سەر ئێران کرد و پێی ڕاگەیاند، دەیەوێت چانسی دانوستانی لەگەڵ ئێران هەبێت بۆئەوەی ڕێگری بکەن لەو وڵاتە کە نەبێتە خاوەنی چەکی ئەتۆم.

دوای ئەوەی تاران پێشنیاری ئەمریکای بۆ ڕاگرتنی پیتاندنی یۆرانیۆم قۆناغ بە قۆناغ، ڕەتکردووە، ئێستا ترەمپ گەشبین نییە بە دانوستانەکانیان لەگەڵ تاران و لە دوایین لێدوانیشیدا لە پۆدکاستێکی نیویۆرک پۆست ڕایگەیاند، متمانەی کەمتربووە لە ئەگەری گەیشتن بە ڕێککەوتن لەگەڵ ئێران بۆ ئەوەی توانای پەرەپێدانی چەکی ئەتۆمی لەلایەن ئەو وڵاتەوە سنوورداربکرێت.