سەدان جووتیاری سنووری نەینەوا ناتوانن گەنمەکانیان ڕادەست بکەن

ئاڤا نیوز

هێشتا وەرگرتنی گەنمی جووتیارانی بەشێکی زۆری ناوچە کوردستانییەکانی پارێزگای نەینەوا وەرنەگیراوە، چاوەڕێی ڕەزامەندی حکومەتی فیدڕاڵی دەکرێت، سەدان جووتیار لەو ڕاگرتنە زەرەرمەندن.

وێنە گەورەکە: هۆبە کشتوکاڵییەکانی بەشێکی ناوچە کوردستانییەکانی سنووری نەینەوا، گرێبەستە کشتوکاڵییەکانیان لەسەر پارێزگای هەولێر و دهۆک کردووە، بەگوێرەی ڕێنماییەکانی وەزارەتی کشتوکاڵی عێراق مەرجە ئەو گرێبەستانە نوێکرابنەوە لە بەڕێوەبەرایەتییەکانی سەر بە خۆیان.

لێدوانی فەرمی: ئەحمەد کیکی، ئەندامی ئەنجوومەنی پارێزگای نەینەوا بە ئاڤای گوت، "سەدان جووتیار بەهۆی ئەم بڕیارەوە لە ناوچە کوردستانییەکان زەرەرمەند دەبن، چونکە تاوەکو ئێستا دەرگای سایلۆکان بەڕووی گەنمەوە واڵا نەکراون، ئەو ناوچانە خراونەتە دەرەوەی پلانی کشتوکاڵی."

لەلایەکی دیکەوە: ڕزگار محەممەد، قایمقامی قەزای مەخموور بە ئاڤای ڕاگەیاند، "پارێزگاری نەینەوا بەفەرمی داوای لە سوودانی کردووە بۆ ئەوەی ئەو ناوچانە بخرێنە چوارچێوەی پلانی کشتوکاڵی و دەرگای سایلۆکان بکرێنەوە، هەموو ڕێکارە کارگێڕییەکان تەواوکراون تاوەکو ئێستا بەغدا ڕەزامەندی نەداوە."

ئەوەی پێویستە بیزانیت: مانگێکە وەرگرتنی گەنمی جووتیاران لە پارێزگاکانی عێراق دەستیپێکردووە، بۆ ئەم ساڵ  پێنج ملیۆن و 100 هەزار دۆنم زەوی لە سەرانسەری عێراق لەنێو پلانی کشتوکاڵی تۆمارکراون.