ماوەی تۆماری کارتی بایۆمەتری درێژ دەکرێتەوە

ئاڤا نیوز

کۆمیسیۆنی هەڵبژاردنەکانی عێراق ماوەی تۆماری کارتی بایۆمەتریی دەنگدەرانی بۆ ماوەی پێنج ڕۆژ درێژ کردەوە.

وێنە گەورەکە: بڕیارە مانگی تشرینی یەکەمی ئەمساڵ، هەڵبژاردنی خولی شەشەمی پەرلەمانی عێراق بەڕێوەبچێت، کۆمیسیۆنی باڵای هەڵبژاردنەکان لە ئامادەکارییەکانی بەردەوامە.

ڕاگەیێنراوی فەرمی: ئەمڕۆ پێنجشەممە، ئەنجوومەنی کۆمیسیارانی کۆمیسیۆنی باڵای سەربەخۆی هەڵبژادنەکانی عێراق بڕیاریدا ماوەی تۆمارکردن و نوێکردنەوەی کارتی بایۆمەتریی دەنگدەران لە 15ـی ئەم مانگە تاوەکو 20ـی مانگ بۆ ماوەی پێنج ڕۆژ درێژ بکاتەوە.

لێدوانی فەرمی: جومانە غەلای، وتەبێژی کۆمیسیۆنی باڵای هەڵبژاردنەکانی عێراق لە ئەگەری درێژکردنەوەی ماوەکە لە دوای تەواوبوونی لە 20ـی ئەم مانگە، بە ئاڤا میدیای ڕاگەیاند: ئەو بڕیارە تەنیا لە دەسەڵاتی ئەنجوومەنی کۆمیسیارانە، پێش تەواوبوونی ماوەکە ئەنجوومەنەکە کۆدەبێتەوە و بڕیار دەدات ئایا ماوەکە درێژتر دەکرێتەوە یاخود نا.

زانیاریی زیاتر: لە کۆی 29 ملیۆن هاووڵاتی کە مافی دەنگدانیان هەیە تاوەکو ئێستا زیاتر لە 21 ملیۆن هاووڵاتی کارتی بایۆمەترییان هەیە، هاوکات کۆی ئەوانەی کارتی بایۆمەتریی خۆیان نوێ کردووەتەوە نزیکەی دوو ملیۆن کەسە.