زانیاریی ئاڤا: ئەو كۆچبەرە كوردانەی لە دوورگەیەكی یۆنان گیریان خواردبوو، ڕزگار دەكرێن

ئاڤا نیوز

 

ژمارەیەک کۆچبەری کورد کە لە دوورگەی سیمییەی سەر بە وڵاتی یۆنان گیریان خواردبوو، لەلایەن ڕێکخراوێکی خێرخوازیی یۆنانەوە ڕزگار دەکرێن.

 

چیرۆکی سەرەکی: نزیکەی 30 کۆچبەری کورد کە لەنێویاندا ژن و منداڵ هەن، لە تورکیاوە بەرەو یۆنان بەڕێکەوتبوون، بەر لەوەی بگەنە شوێنی مەبەست، لە دوورگەی (سمییە-Symi )  سەر بە وڵاتی یۆنان، بۆ ماوەی زیاتر لە شەو و ڕۆژێک گیریان خوارد و نان و ئاویش لەلا نەمابوو، ئاڤا وەک تاکە دەزگای میدیایی ئەو هەواڵەی بڵاوکردەوە.

 

زانیاریی بەدەستهاتوو: ئاڤا زانیویەتی، دوای ئەوەی کۆچبەرە کوردەکان پەیوەندییان بە کەسوکاریان و ژمارەیەک چالاکوانی مافی پەنابەران لە ئەوروپا کرد، هەوڵەکان چڕکرانەوە بۆ گەیاندنی دەنگیان، دوای تێپەڕبوونی زیاتر لە شەو و ڕۆژێک بەسەر مانەوەیان لە دوورگەکە، دواجار ڕێکخراوێکی خێرخوازیی یۆنان بڕیار دەدات بەدەنگیانەوە بچێت و ڕزگاریان بکات.

 

بەتەنیشت ئەم بابەتەوە: ئاڤا دەنگی ئەو کۆچبەرانەی کە گیریان خواردووە، گەیاندە حکومەتی هەرێمی کوردستان و سەرچاوەیەک لە فەرمانگەی پەیوەندییەکانی دەرەوە بەڵێنی دا بەدواداچوونی جددی بۆ وردەکاری بابەتەکە بکات و بەدەنگیانەوە بچێت.