سوودانی: بەکارهێنانی خاک و ئاسمانی عێراق بۆ هێرشکردنە سەر وڵاتانی دراوسێ ڕەت دەکەینەوە

ئاڤا نیوز

سەرۆکوەزیرانی عێراق لەگەڵ بەرپرسانی ئەمریکا و هاوپەیمانیی نێودەوڵەتیی کۆبووەوە و ڕایگەیاند: عێراق بەکارهێنانی خاک و ئاسمانی ڕەت دەکاتەوە بۆ ئەنجامدان یان ئاسانکاریکردن بۆ دەستدرێژیکردنە سەر هیچ لە وڵاتانی دراوسێ.

وێنە گەورەکە: دوای پێشهاتەکانی ناوچەکە و هێرشی ئیسرائیل بۆ سەر ئێران، محەممەد شیاع سوودانی، سەرۆکوەزیرانی عێراق پێشوازیی لە ستیڤن ڤاگن، هەڵسوڕێنەری کاروباری باڵیۆزخانەی ئەمریکا لە عێراق و جەنەراڵ کیڤن لیهی، فەرماندەی هێزەکانی هاوپەیمانیی نێودەوڵەتیی بۆ بەرەنگاربوونەوەی داعش کرد.

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق ڕایگەیاند: سەرۆکوەزیرانی عێراق دووپاتی کردەوە کە ئەوەی بەرامبەر ئێران کرا پێشێلکردنی ڕوونی یاسای نێودەوڵەتی و دەستدرێژیی بوو و ئاسایشی هەرێمایەتی و نێودەوڵەتی تێکدەدات.

سوودانی بە تووندی بەکارهێنانی خاک و ئاسمانی عێراق ڕەت دەکاتەوە بۆ ئەنجامدان یان ئاسانکاریکردن بۆ دەستدرێژیکردنە سەر هیچ لە وڵاتانی دراوسێی، هاوکات جەختی لە مافی عێراق لە پاراستنی سەرەوەریی خۆی کردەوە و ڕایگەیاند، حکومەتی عێراق هەموو ڕێکارە یاساییەکان دەگرێتەبەر لەم پێناوەدا.

لەلایەکی دیکەوە: ستیڤن ڤاگن و جەنەراڵ کیڤن لیهی دووپاتیان کردەوە ئەمریکا بەهیچ جۆرێک بەشداریی لەو هێرشە نەکردووە، ئاماژەیان بە پەرۆشیی وڵاتەکەیان بۆ ڕێگریکردن لە ڕاکێشانی عێراق بۆ ناو ململانێکان کردەوە، بەگوێرەی ئەو ڕێککەوتنە چوارچێوە ستراتیژییەی نێوان هەردوو وڵات واژۆکراوە.

ئەوەی پێویستە بیزانیت: بەرەبەیانی ئەمڕۆ هەینی 2025-06-13، ئیسرائیل لە ڕێگەی 200 فرۆکەی جەنگییەوە هێرشێکی بەرفراوانی بۆ سەر 12 شاری ئێران و 8 شاری دیکەی ڕۆژهەڵاتی کوردستان ئەنجامدا، ژمارەیەک فەرماندەی باڵای سەربازی سوپای پاسدارانی ئێران و شەش زانای ئەتۆمی ئەو وڵاتە کوژران، و هێرشەکان تا ئێستا بەردەوامن.