خانەی دادی سنە: هەر جۆرە دڵخۆشی دەربڕینێك بە جەنگی ئیسرائیل و ئێران تاوانە

ئاڤا نیوز

خانەی دادی پارێزگای سنە خەڵكی ئاگادار دەكاتەوە لەوەی، هەر جۆرە دەربڕینێكی دڵخۆشی لە تۆڕە كۆمەڵایەتییەكان سەبارەت بە جەنگی ئیسرائیل و ئێران، بە تاوان ئەژمار دەكرێت و ڕێوشوێنی یاسایی بەرامبەر كەسانی سەرپێچیكار دەگیرێتە بەر.

زانیاریی بەدەستهاتوو: ڕێکخراوی مافی مرۆڤی هەنگاو، كە بایەخ بە پرسی مافەكانی مرۆڤ دەدات لە ئێران و ڕۆژهەڵاتی كوردستان، بڵاوكراوەیەكی خانەی دادی پارێزگای سنەی دەستكەوتووە، كە تێیدا خەڵكی بە كورتەنامە ئاگادار كراونەتەوە بەوەی كە، هەر جۆرە دڵخۆشی دەربڕینێك یاخود هاندان بەمەبەستی تێکدانی ئاسایش پەیوەست بەو جەنگەی لەنێوان ئیسرائیل و ئێران هەڵگیرساوە، بە تاوان دادەنرێت و سەرپێچیكار تووشی لێپرسینەوەی یاسایی دەكرێت، داواش لە هاووڵاتیان دەكات هەر جۆرە پۆستێكی لەمجۆرەیان بڵاوكردبێتەوە، بەزووترین كات بیسڕنەوە.

بە تەنیشت بەم بابەتە: میدیاکانی کۆماری ئیسلامیی ئێران ڕایانگەیاندووە، پێنج هاووڵاتیی دانیشتووی یەزد بەهۆی "تێکدانی بیروڕای گشتی و هەوڵی وێنەگرتنەوە لەو شوێنانەی تەلبەند کراون" دەستگیر كراون.

لەلایەكی دیكەوە: دامەزراوەی ئیتلاعاتی سەر بە سوپای پاسداران هۆشداری دەدات لەوەی، "هەرچەشنە کردەوەیەکی کولتووری، میدیایی، پڕوپاگەندەیی و یارمەتی، بەئامانجی پشتیوانیكردن یاخود بەهێزكردنی ئیسرائیل بێت، تاوانەی نیشتمانییە و تووندترین سزای بەدواویە.