چەند پارێزگایەکی عێراق هەڕەشەی تیشکی کوشندەی وێستگە ئەتۆمییەکانی ئێرانیان لەسەرە

ئاڤا نیوز

لەگەڵ ئەوەی تاوەکو ئێستا لە ئەنجامی هێرشی ئیسرائیل بۆ سەر دامەزراوە ئەتۆمییەکانی ئێران، هیچ چالاکیەکی تیشکدەر لە ئاسمانی عێراق تۆمار نەکراوە، بەڵام بەپێی ڕوانگەی سەوزی عێراق سێ پارێزگای باشووری هاوسنووری ئێران هەڕەشەی تیشکی کوشندەیان لەسەرە.

چیرۆکی سەرەکی: ماوەی چوار ڕۆژە جەنگی نێوان ئیسرائیل و ئێران دەستیپێکردووە، بەرەبەیانی ڕۆژی هەینی ئیسرائیل بە 200 فڕۆکەی جەنگی چەندین ناوەندی ستراتیژی ئەتۆمی و بنکەی سەربازی لە ئێران بۆردوومان کرد، لە ئاکامدا تاوەکو ئێستا زیاتر لە 32 فەرماندەی سەربازی سوپای پاسداران و زیاتر لە نۆ زانای بواری ئەتۆمی کوژراون.

ڕاگەیێنراوی فەرمی: ڕوانگەی سەوزی عێراق لە زاری ئەیوب حەسەن، شارەزای بواری کیمیاوە بڵاوی کردەوە،  هەر یەکە لەپارێزگای بەسرە، مەیسان  و زیقار لە ئەگەری دووبارەبوونەوەی هێرشی سەربازی ئیسرائیل بۆ سەر دامەزراوە ئەتۆمییەکانی ئێران هەڕەشەی تیشکی کوشندەیان لەسەرە.

مه‌ترسیه‌ پێشبینكراوه‌كان: ئەو شارەزایەی بواری کیمیاوی ئاماژەی بەوەشکردووە، هەردوو دامەزراوەی ئەتۆمیی "نەتەنز" و "بوشەهر"، زۆرترین مەترسی پیسبوونی تیشکدەری لەسەر ئەو سێ پاریزگایە هەیە، بەڵام دامەزراوەی ئەتۆمی "فۆردۆ" کە زیاتر لە 60% یۆرانیۆمی تێدا پیتێنراوە بەهۆی هەڵکەوتەی جوگرافی لە نێوان زنجیرە شاخێکدا دەستی هێرشە ئاسمانییەکانی ئیسرائیلی پێنەگەیشتووە و مەترسی تیشکی کوشندەی لەسەر نییە.
 
ئەوەی پێویستە بیزانیت: دامەزراوەی ئەتۆمیی "نەتەنز" 400 کیلۆمەتر لە سنووری عێراقەوە دوورە و 650 کیلۆمەتر لە بەغدای پایتەختەوە دوورە، دامەزراوەی بوشەهر کە بۆ بەرهەمهێنانی کارەبا بەکاردێت، 450 کیلۆمەتر لە بەسرە دوورە و 500 کیلۆمەتر لە شاری عمارە دوورە، دامەزراوەی ئەتۆمی فۆردۆش 450 بۆ 500 کیلۆمەتر لە کەربەلا و نەجەفەوە دوورە.

لەلایەکی دیکەوە: پسپۆرێکی بواری کیمیاوی دەڵێت، تەقاندنەوەی وێستگە ئەتۆمییەکانی ئێران زیان بە هەرێمی کوردستانیش دەگەیێنێت.