سەرۆککۆماری عێراق داوای کڕینی سیستمی بەرگری ئاسمانی بۆ پاراستنی عێراق دەکات

ئاڤا نیوز

سەرۆککۆماری عێراق لەگەڵ سەرۆکی پەرلەمان کۆبووەوە و هەردوولا داوایانکرد بۆ ڕێگریکردن لە بەزاندنی ئاسمانی عێراق، حکومەت سیستمی بەرگری ئاسمانی بکڕێت و سیستمەکە بۆ عێراق چالاک بکرێت.

وێنە گەورەکە: بەمەبەستی هێورکردنەوەی شەڕ و گرژییەکانی ناوچەکە، عێراق لە دوو ئاستدا دەستی بە جووڵە کردووە، ئاستی یەکەم لەناوخۆ دایە و دەیەوێت یەکدەنگی ناوخۆیی بۆ دوورخستنەوەی عێراق لە گرژییەکان درووست بکات، لە ئاستی دەرەوەش لەگەڵ وڵاتانی ناوچەکە هەوڵەکانی بۆ ڕاگرتنی گرژییەکان چڕکردووەتەوە.

ڕاگەیێنراوی فەرمی: نووسینگەی ڕاگەیاندنی سەرۆکی پەرلەمانی عێراق بڵاویکردەوە، مەحموود مەشهەدانی سەرۆکی پەرلەمان پێشوازیی لە د. لەتیف ڕەشید، سەرۆککۆمار کردووە، لە کۆبوونەوەکەدا هەردوولا هێرشەکانی ئیسرائیلیان بۆسەر ئێران سەرکۆنە کردووە و پشتیوانی هەوڵەکانی حکومەتییان کردووە بۆ پاراستنی ئاسایشی نیشتیمانی، بۆ ئەو مەبەستەش بەپێویستیان زانی ئاسایشی سنوورەکان و ئاسمانی وڵات بە کڕینی چەکی پێشکەوتوو، نوێ، سیستیمی بەرگریی ئاسمانی و چالاکردنی ئەو سیستمە بۆ وڵات فەراهەم بکرێت.

ئەوەش خراوەتەڕوو، لە کۆبوونەوەکەدا ڕێککەوتن کراوە کە سێ سەرۆکایەتییەکەی عێراق بەشێوەی خولی بۆ چارەسەرکردنی کێشەکانی ناوخۆ و لابردنی ئاستەنگییەکان لەبەردەم دەرچوواندنی یاسای نەوت و غاز و یاساکانی دیکە کۆببنەوە.