کەسوکاری شەهیدان لە سنووری نەینەوا زەوی وەردەگرن

ئاڤا نیوز

ڕەزامەندی لەسەر پێدانی زەوی بە کەسوکاری شەهیدان لە سنووری نەینەوا وەرگیراوە، سەدان خانەوادەی کورد کە کارتی زانیارییان ئەو سنوورەیە سوودمەند دەبن.

وێنە گەورەکە: لەچوارچێوەی قەرەبووکردنەوەی خانەوادەی شەهیدان لە عێراق، زیاتر لە 10 هەزار خانەوادەی شەهیدان لە وەرگرتنی زەوی سوودمەند دەبن، سەدان خانەوادەی کوردی تێدان بەمەرجێک شەهیدەکەیان لە سنووری عێراق بووبێتن و دانیشتووی سنووری ماددەی 140 بێت.

لێدوانی فەرمی: محەممەد جاسم، ئەندامی ئەنجوومەنی پارێزگای نەینەوا؛ بە ئاڤای گوت، "لە ئەنجوومەنی پارێزگا پڕۆژەیەکمان پەسەند کردووە، کە دەبێت خانەوادەی شەهیدان بەگوێرەی بەرواری شەهیدبوونیان زەوی وەرگرن نەوەک بەپێی بەرواری تەواوکردنی مامەڵەکانیان."

گوتیشی، "لە ساڵی 2006 زیاتر لە 100 کورد لەسنووری نەینەوا شەهید بوون، جگە لەوانەی شەڕی داعش، هاوکات ئەو پرۆسەیە شەهیدانی پێشمەرگەش دەگرێتەوە، بەو مەرجەی دانیشتووی نەینەوا بن."