پووتین: لەگەڵ زێلێنسکی کۆدەبمەوە بەڵام ماوەی سەرۆکایەتییەکەی کۆتاییهاتووە

ئاڤا نیوز

ڤلادیمێر پووتین، سەرۆکی ڕووسیا، ئامادەیی خۆی بۆ ئەنجامدانی کۆبوونەوەیەک لەگەڵ ڤلۆدیمیر زێلێنسکی سەرۆکی ئۆکراینا دەربڕی، بەڵام لەبارەی ڕێککەوتنی ئاشتی جەخت لەوە دەکاتەوە لە ڕووی یاساییەوە ماوەی سەرۆکایەتیی ناوبراو کۆتایی هاتووە مافی ئەوەی نییە دەرئەنجامی ڕێککەوتنەکان واژۆ بکات.

چیڕۆکی سەرەکی: دوای سێ ساڵی جەنگی نێوان ڕووسیا و ئۆکراینا دواجار هەردوولا لەسەر ئەنجامدانی دانوستان ڕێککەوتن و لەمیانەی ئەنجامدانی دوو گەڕی دانووستانی ڕاستەوخۆ لە تورکیا هەردوولا لەسەر چەند پرس و بواری مرۆییدا  ڕێککەوتنیان واژۆ کرد لەوانەش گەڕی ئاڵۆگۆڕی بارمتەکان و تەرمی کوژراوەکان.

لێدوانی فەرمی: ڤلادێمیر پووتین، سەرۆکی ڕووسیا ڕایگەیاند،'' ئامادەم لەگەڵ هەر کەسێک کۆ ببمەوە، بە زیلێنسکیشەوە ئامادەین بۆ هەر ڕێککەوتنێکی ئاشتی، بەڵام هەر ڕێککەوتنێکی کۆتایی دەبێت واژۆی دەسەڵاتە شەرعیەکانی لەسەر بێت" جەختی لەوە کردەوە ماوەی سەرۆکایەتیی زێلێنسکی کۆتایی هاتووە.

لەلایەکی دیکەوە: ئۆکراینا لای خۆیەوە جەخت لەوە دەکاتەوە زێلێنسکی هێشتا دەسەڵاتی تەواوی بەدەستەوەیە.

زانیاریی زیاتر: لە پەراوێزی کۆڕبەندی ئابووریی نێودەوڵەتی سانت پترسبۆرگ، پووتین داوای دەستپێکردنەوەی دانوستانە ڕاستەوخۆکانی نێوان مۆسکۆ و کیێڤی کرد و دەڵێت، پێویستە لە دوای 22ـی حوزەیران دەست پێبکاتەوە.