ئەمڕۆ 21 گەشتی ئاسمانی لە فڕۆكەخانەی بەسرە دەکرێت

ئاڤا نیوز

گەشتی ئاسمانی لەنێو سەرجەم فرۆكەخانەكانی عێراق، تەنها لە فرۆكەخانەی نێودەوڵەتیی بەسرە بەشێوەیەكی سنووردار بەردەوامە و ئەمڕۆ هەینیش، 21 گەشتی ئاسمانیی چوون و هاتن لە فرۆكەخانەكە دەکرێت.

وێنە گەورەكە: بەهۆی بەردەوامی جەنگ و گرژییەكان و ئاراستەكردنی مووشەك و درۆن لەنێوان ئیسرائیل و ئێران كە بە ئاسمانی عێراقدا ڕەت دەبن، وەزارەتی گواستنەوەی عێراق، لەپێناو پاراستنی سەلامەتیی گەشتیاران، بڕیاریدا بە ڕاگرتنی سەرجەم گەشتە ئاسمانییەكان لەهەموو فڕ‌ۆكەخانەكانی عێراق و داخستنی كاتیی ئاسمانی وڵاتەكەی لە 13-6-2025 بەدواوە كە قۆناغ بە قۆناغ ڕایگەیاند، بڕیارەكەش تا كۆتایی ئەم مانگە درێژكرایەوە.

ڕاگەیێنراوی فەرمی: هێڵی ئاسمانی عێراقی، خشتەی گەشتەكانی ئەمڕۆ هەینی 20ـی حوزەیرانی بڵاوكردووەتەوە كە خۆی لە 21 گەشتدا دەبینێت و سەرجەمیان لەفڕۆكەخانەی بەسرە ئەنجامدەدرێن.

زانیاریی زیاتر: بەپێی خشتەكە، هاتووچۆی گەشتەكان لەنێوان بەسرە و هەریەك لە شارەكانی: بەیروت، ئیستەنبووڵ، دەلهی، دوبەی، كاراچی، تونس، قاهیرە دەبێت.