كۆبوونەوەی جنێف لەبارەی جەنگی ئیسرائیل و ئێران دەستیپێكرد

ئاڤا نیوز

كۆبوونەوەی جنێف لەبارەی جەنگی ئیسرائیل و ئێران بە بەشداری وڵاتانی بەریتانیا، فەرەنسا، ئەڵمانیا و بەرپرسی سیاسەتی دەرەوەی یەکێتیی ئەورووپا دەستیپێكرد، وەزیری دەرەوەی ئێران ئامادەی كۆبوونەوەكەیە.

لێدوانی فەرمی: عەباس عێراقچی، وەزیری دەرەوەی ئێران لە كۆبوونەوەكە وتارێكی پێشكەش كرد و ڕایگەیاند، ئەوەی ئیسرائیل ئێستا دەیكات، پێشێلكاری هەموو عورف و یاسا نێودەوڵەتییەكانە و ئێران تەنها بەرگری لەخۆی دەكات.

- ئیسرائیل شوێنە مەدەنییەكان بەئامانج دەگرێت و دەیەوێت هەمان ئەو كۆمەڵكوژییەی لە كەرتی غەززە ئەنجامی دەدات، بەرامبەر ئێرانیش دووبارەی بكاتەوە.

داواشی لە وڵاتان كرد، بەرامبەر پێشێلكارییەكانی ئیسرائیل بێنە دەنگ و دەستدرێژییەكانی ئیسرائیل بوەستێنن.

بابەتە ستراتیژییەكە: ئامانج لە كۆبوونەوەكەی جنێڤ، لەپاڵ تاوتوێكردنی هەوڵەكان بۆ ڕاگرتنی جەنگ، پرسی دەستپێكردنەوەی گفتوگۆكان تایبەت بە بەرنامە ئەتۆمییەكەی ئێران بە بەشداری نوێنەری ئەمریكا باس دەكرێت.

باكگراوند: ماوەی هەشتە ڕۆژ جەنگی نێوان ئیسرائیل و ئێران دەستیپێكردووە و بەردەوام یەكتر مووشەكباران دەكەن، بەهۆیەوە سەدان كەس كوژراون و هەزارانیش بریندارن، جگە لە بەئامانجگرتنی دامەزراوە سەربازی و ئەمنی و حكومییەكانی یەكتر.