واشنتن پۆست: ئێران هۆشداریی داوەتە قەتەر لەبارەی بنکە سەربازییەکانی ئەمریکا

ئاڤا نیوز

ڕۆژنامەیەکی ئەمریکی لەسەر زاری بەرپرسێکی ئەوروپی ئاشکرای کرد، ئەم هەفتەیە ئێران هۆشداریی داوەتە قەتەر ئەگەر ئەمریکا بەشدار بێت لە هێرشکردنە سەر ئێران، ئەو کات بنکەی سەربازیی ئەمریکا لەو وڵاتە دەکەنە ئامانج.

وێنە گەورەکە: جەنگی ئیسرائیل و ئێران بەردەوامە و ئەمریکاش هۆشداری بە ئێران دەدات کە بەبێ مەرج بگەڕێتەوە سەر مێزی گفتوگۆ و کۆتایی بەم جەنگە بهێنێت، ئەگینا ئەگەر هەیە ئەمریکا بەشدار بێت لەو جەنگە، هاوکات ئێران هەڕەشە دەکات کە پێگە و بەرژەوەندییەکانی ئەمریکا لە ڕۆژهەڵاتی ناوەڕاست دەکاتە ئامانج.

ڕاگەیێنراوی فەرمی: بەگوێرەی ڕۆژنامەی "واشنتن پۆست"، بەرپرسانی ئێران هۆشدارییان داوەتە قەتەر وەکو وەڵامێک بۆ بەشداری ئەمریکا لەپاڵ ئیسرائیل لە جەنگی دژ بە ئێران، بنکە سەربازییەکانی ئەمریکا لە قەتەر و وڵاتانی کەنداو بۆردوومان دەکەن.

زانیاریی زیاتر: ڕۆژنامەکە دەڵێت، ئێران باڵیۆزخانە و نوێنەرایەتییە دیپلۆماسییەکانی ئەمریکا لە ناوچەکە بە ئامانج دەگرێت، هاوکات گرووپە چەکدارەکانی نزیک لە ئێران هەڕەشەن بۆ سەر بەرژەوەندییەکانی ئەمریکا لە ڕۆژهەڵاتی ناوەڕاست.

ئەوەی پێویستە بیانیت: دۆناڵد ترەمپ، سەرۆکی ئەمریکا و بەرپرسانی وڵاتەکە تاوتوێی بەشداریکردن لە هێرشکردنە سەر ئێران و وێستگە ئەتۆمییەکانی دەکەن، هاوکات چەندین کەشتیی جەنگی لە ڕۆژهەڵاتی ناوەڕاست جێگیر کردووە.

لەلایەکی دیکەوە: ئێوارەی ڕۆژی هەینی 2025-06-20، کەشتیی سەربازیی وێرانکەری ئەمریکی یو ئێس ئێس نیمیتز گەیشتە سنووری ڕۆژهەڵاتی ناوەڕاست.