شاخەوان عەبدوڵڵا: دادگەی فیدراڵی نادەستوورییە و داوامان كردووە یاساكەی هەموار بكرێتەوە

ئاڤا نیوز

جێگری سەرۆکی پەرلەمانی عێراق، بڕیارەکانی دادگەی فیدراڵی عێراق بە نادەستووری ناودەبات، دەشڵێت "داوامان کردووە یاسای دادگەی فیدراڵی هەموار بکرێتەوە و بەمزووانە بابەتەکە دێتە پەرلەمانی عێراق".

وێنە گەورەکە: پارتی بڕیارەکانی دادگای فیدراڵی بە پێشێلکردنی دەستوور و هەوڵدان بۆ بچووکردنەوەی قەوارەی هەرێمی کوردستان دادەنێت، بۆیە لە ڕاگەیێنراوێكدا نیگەرانی لەبارەی شێوازی هەڵبژاردنی پەرلەمانی كوردستان دەربڕی و هەڕەشەی كشانەوەشی لە پرۆسەی سیاسی عێراق كرد.

لێدوانی فەرمی: شاخەوان عەبدوڵڵا، جێگری سەرۆکی پەرلەمانی عێراق، كە لەسەر پشكی پارتی ئەو پۆستەی وەرگرتووە، لەمیانی ئاهەنگی نەورۆز لە کەرکووک ڕایگەیاند: دادگەی باڵای فیدراڵی ناوەکەی دادگەی فیدراڵییە، بەڵام بڕیارەکانی بڕیاری ناوەندییە و پێشێلکردنی سیستەمی سیاسی فیدراڵییە لە عێراق، لەکاتی گفتوگۆکانیش بۆ پێکهێنانی حکومەت یەکێک لەو برگانەی داوامان کرد هەموارکردنەوەی یاسای دادگەی فیدراڵییە.

زانیاریی زیاتر:  ناکرێت دادگەی فیدراڵی بڕیارەکانی کۆتایی و پەیوەستکەر بێت، بەڵام بۆخۆی دادگەیەکی نادەستووری بێت، چونکە بەپێی ماددەی 92 لە دەستوور لەگەڵ ئەم پێکهاتەیەی ئێستایدا ناگونجێت ئەمەش لەگەڵ هێز و لایەنە سیاسییەکان قسەی لەسەر کراوە. لێکتێگەیشتن هەیە بۆ ئەوەی بە نزیکترین کات ئەم بابەتە بێتە پەرلەمان و خوێندنەوەی بۆ بکرێت کە دادگەیەک هەبێت سنووری خۆی بپارێزێت. شاخەوان عەبدوڵڵا وای گوت.