سوپای ئیسرائیل کوژرانی سێ فەرماندەی باڵای سەربازیی سوپای پاسداران ڕادەگەیێنێت

ئاڤا نیوز

سوپای ئیسرائیل سێ فەرماندەی باڵای سەربازیی سوپای پاسدارانی کوشت، یەکێکیان پردی پەیوەندی نێوان ئێران و بزووتنەوەی حەماسی فەلەستینی بووە.

وێنە گەورەکە: بۆردوومانی هەردوو وڵاتی ئیسرائیل و ئێران لە میانەی جەنگی نێوانیان بۆ سەر یەکتری بەردەوامە، ئیسرائیل لە پاڵ بە ئامانج گرتنی بنکە ئەتۆمییەکان، فەرماندە سەربازییە باڵاکانی ئێران بە ئامانج دەگرێت.

زانیاریی بەدەستهاتوو: سوپای ئیسرائیل دەڵێت، شەوی ڕابردوو فرۆکە جەنگییەکانیان لە ناوچەیەکی باشووری تاران، سەعدی ئیزادی فەرماندەی فەیلەقی فەلەستینی ناو سوپای قودس و ڕێکخەری پەیوەندییەکانی نێوان ئێران و حەماسیان کوشتووە.


زانیاریی زیاتر: وەکو سوپای ئیسرائیل دەڵێت، ئیزادی لەناو شوقەیەک خۆی شاردووەتەوە، دوای هەوڵێکی زۆری هەواڵگری، ئینجا دۆزیویانەتەوە و شوێنەکەیان ئاشکرا کردووە و کوشتوویانە.

لەلایەکی دیکەوە: سوپای پاسداران ڕایگەیاند، ژەنەراڵ بەهنام شەهریاری، یەکێکی تر لە فەرماندەکانی فەیلەقی قودس کوژراوە،  لە ناوچەیەکی رۆژئاوای تاران بە ئۆتۆمبێلەکەی سوڕاوەتەوە، لێیان داوەو کوشتوویانە.

ئەم فەرماندەیە بەرپرسی پەیوەندی ڕاستەوخۆ بووە لەگەڵ حیزبوڵا، حووسیەکان و گرووپە چەکدارەکانی تر و ڕاستەوخۆ مووشەک و چەک و تەقەمەنی بۆ ناردوون.

دوێنێش ژەنەراڵ ئەمین پور، یەکێک لە فەرماندەکانی سوپای پسداران کوژرا، ئەمیشیان بەرپرس بووە لە تەقاندنی دەیان درۆن لە باشووری رۆژئاوای تارانەوە بەرەو ئیسرائیل.