لەتیف ڕەشید داوایەکی سەرۆكی دادگای فیدڕاڵی ڕەتدەکاتەوە

ئاڤا نیوز

 

سەرۆککۆماری عێراق داوایەکی سەرۆكی دادگای فیدڕاڵی بۆ کۆبوونەوەی هاوپەیمانی ئیدارەی دەوڵەت بۆ چارەسەری ناکۆکییەکانی نێوان دادگاکە و دادگای تێهەڵچوونەوە ڕەتدەکاتەوە و دەڵێت، ئەو کێشەیە ئەنجوومەنی باڵای دادوەریی چارەسەری بکات.

 

وێنە گەورەکە: 17ی ئەم مانگە جاسم محەممەد عەبود، سەرۆکی دادگای باڵای فیدڕاڵی عێراق لە نوسراوێکدا و بە ئامانجی چارەسەری ناکۆکییەکانی نێوان دادگاکە و دادگای تێهەڵچوونەوە کە ماوەیەکە لەسەر پرسەکان بڕیاری دژ بەیەک دەردەکەن، داوای کۆبوونەوەی سەرۆکایەتییەکان و لایەنە پێکهێنەرەکانی حکومەتی لە چوارچێوەی هاوپەیمانی ئیدارەی دەوڵەتدا کردبوو، پێشتریش سەرۆکی پەرلەمانی عێراق داواکارییەکەی سەرۆکی دادگای فیدڕاڵی ڕەتکردبووەوە.

 
نوسراوی فەرمی: د. لەتیف ڕەشید، سەرۆککۆماری عێراق 19ی ئەم مانگە وەڵامی نوسراوەکەی سەرۆکی دادگای فیدڕاڵی داوەتەوە و دەڵێت، داواکارییەکەتان پێچەوانەی بنەمای سەربەخۆیی دەسەڵاتی دادوەرییە و دەرگا بۆ دەستوەردان لەبواری دادوەرییدا دەکاتەوە.

 

ئەوەشی خستووەتەڕوو، بۆیە پێشنیاز دەکات بۆ چارەسەری ناکۆکییەکانی نێوان دادگای فیدڕاڵی و دادگای تێهەڵچوونەوە، ئەنجوومەنی باڵای دادوەریی کۆببێتەوە و ئەوان بڕیار لەسەر ئەو بابەتە بدەن.

بە تەنیشت ئەم بابەتەوە: ڕۆژی 19ـی حوزەیران، شەش ئەندامی سەرەکی و سێ ئەندامی یەدەگی دادگای باڵای فیدراڵیی عێراق بە کۆمەڵ دەستلەکارکێشانەوەیان خۆیان پێشکەش کرد.