یەکەم هەڵوێستی فەرمیی عێراق لەبارەی گریمانەی داخستنی گەرووی هورمز

ئاڤا نیوز 

 

وەزیری نەوتی عێراق ڕایگەیاند، هەرچەندە تائێستا هەناردەی نەوت لەڕێگەی دەریاییەوە بەردەوامە و هیچ ئاستەنگییەکی لەبەردەمدا نییە، بەڵام ئەگەر گەرووی هورمزیش دابخرێت، بەغدا ژمارەیەک ڕێگەی جێگرەوەی لەبەردەمە و ئێستا کاریان لەسەر دەکات.

 

وێنە گەورەکە: هەڕەشەکانی ئێران بۆ داخستنی گەرووی هورمز، وڵاتانی بەرهەمهێنەری نەوتی خستووەتە دڵەڕاوکێوە، بۆیە لە ئێستاوە بەدوای ڕێگای جێگرەوەدا دەگەڕێن، بۆ عێراقیش دەستپێکردنی هەناردەی نەوت لەڕێگەی بۆڕی نەوتی کەرکووک - جەیهان و هەرێمی کوردستان، یەکێکە لە بژاردەکان کە باسی لێوەدەکرێت.

 

ڕاگەیێنراوی فەرمی: حەیان عەبدولغەنی، وەزیری نەوتی عێراق لەمیانەی کۆبوونەوەیدا لەگەڵ کازم توکی، ئەندامی لیژنەی نەوت و غازی پەرلەمان، ئاماژەی بەوەکرد، تاوەکو ئەمڕۆ هەناردەی نەوت بەشێوەیەکی ئاسایی بەردەوامە و ئەگەر گەرووی هورمزیش دابخرێت، "ڕێگای جێگرەوە بۆ هەناردەکردن هەیە و وەزارەتی نەوت کارییان لەسەر دەکات".

 

ئەوەشی خستووەتەڕوو، وەزارەتی نەوت سەرکەوتوو بووە لە زیادکردنی بەرهەمهێنانی نەوت لە چەند کێڵگەیەکدا، ئەوەش مانای وایە کاری بەرهەمهێنان و هەناردەکردن بەبێ ئاستەنگی بەردەوامە.

 

لەلایەکی دیکەوە: دوێنێ نەبیل مەرسوومی، شارەزای ئابووری لە عێراق ڕایگەیاند، دەبێت بەغدا خۆی بۆ ئەگەری داخستنی گەرووی هورمز ئامادە بکات و ئامادەکردنی یەدەگی نەوتیش لەڕێگەی کەشتیی لەسەر ئاو، هاوشێوەی ئێران و سعودیە، وەک یەکێک لە بژاردەکان پێشنیاز دەکات.