زێلینسكی: ترەمپ جەنگی ڕۆژهەڵاتی ناوەڕاستی یەكلاكردەوە

ئاڤا نیوز

سەرۆكی ئۆكراینا، هۆشداری لە بڵاوبوونەوەی چەكی ئەتۆمی دەدات، بەشێوەیەكی ناڕاستەوخۆش پشتیوانی وڵاتەكەی بۆ بەئامانجگرتنی دامەزراوە ئەتۆمییەكانی ئێران لەلایەن ئەمریكاوە دەربڕی.

لێدوانی فەرمی: ڤلۆدیمێر زێلینسكی، سەرۆكی ئۆكراینا، لە وتارێكی ڤیدیۆییدا ستایشی دۆناڵد ترەمپی كرد، كە مەترسی بەكارهێنانی چەكی ئەتۆمی لەلایەن ئێرانەوە ڕەواندەوە و لەمبارەیەوە وتی: "ترەمپ ئەو بابەتەی یەكلاكردەوە."

ئەوەی لەبارەیەوە دەگوترێت: پەیامەكەی زێلینسكی وەها لێكدەدرێتەوە كە پشتیوانی ناڕاستەوخۆی هێرشی ئاسمانی ئەمریكا بۆ سەر دامەزراوە ئەتۆمییەكانی ئێران دەكات.

زانیاریی زیاتر: سەرۆكی ئۆكراینا دووپات لە چارەسەریی ئاشتیانە بۆ ناكۆكی و گرژییەكانی ڕۆژهەڵاتی ناوەڕاست و جەنگی سەر وڵاتەكەی دەكاتەوە.

باكگراوند: بەرەبەیانی یەكشەممە 22ـی حوزەیرانی 2025، ئەمریكا لەڕێگەی مووشەک هەر سێ دامەزراوە ئەتۆمییەكەی ئێرانی بۆردوومان كرد و بەگوێرەی لێدوانی پێنتاگۆن، زەرەر و زیانێكی زۆری بە ژێرخانی ئەتۆمی ئەو وڵاتە گەیاندووە.