پۆلیسی كەركووك: چاوەڕێی فەرمانی سوودانین بۆ وەرگرتنی دۆسیەی ئەمنیی شارەکە

ئاڤا نیوز

 

پۆلیسی كەركووک بۆ وەرگرتنەوەی دۆسەی ئەمنیی شارەكە ئامادەیە و ئێستا چاوەڕوانی فەرمانی سەرۆكوەزیرانی عێراقن بۆ ئەوەی دۆسیەكەیان ڕادەست بکرێت و فەرماندەی ئۆپەراسیۆنەكان بكشێتەوە.

 

چیرۆکی سەرەکی: کۆتایی مانگی یەکی ئەمساڵ، عەبدولئەمیر شەمەری، وەزیری ناوخۆی عێراق لەگەڵ پارێزگاری بەوەكالەتی كەركووك، فەرماندەی پۆلیس و بەرپرسی دۆسیەی ئەمنیی شارەكە کۆبووەوە و گوتی، لە داهاتوویەکی نزیکدا دۆسیەی ئەمنیی کەرکووک و قەزای حەویجە، ڕادەستی پۆلیسی شارەکە دەکرێتەوە.

 

لێدوانی فەرمی: عامر نوری، گوتەبێژی پۆلیسی كەركووك بە ئاڤا نیوزی ڕاگەیاند: "پۆلیسی كەركووك بە تەواوەتی ئامادەیە بۆ وەرگرتنەوەی دۆسیەی ئەمنی، هەموو ئەو كەموكورتیانەی کە هەبوون چارەسەركراون، تەنیا چاوەڕێی فەرمانی سەرۆكوەزیرانی عێراقین بۆ ئەوەی دۆسیەكەمان ڕادەست بکرێتەوە".

 

ئەوەی پێویستە بیزانیت: نەبوونی كامێرای چاودێری لە سەنتەری شار و بازگەكان، كێشەی سكانەر لە بازگەكان، نەبوونی كارمەندی پێویست بۆ بازگەكان و بنكەكانی پۆلیس، گرفتە سەرەكییەكانی دۆسیەی ئەمنیی شارەكە بوون.

 

زانیاریی زیاتر: وەزارەتی ناوخۆی عێراق بە سێ قۆناغی جیاواز 3,700 کارمەندی پۆلیسی بە شێوازی گرێبەست دامەزراند، بەڵام تاوەکو ئێستا دۆسییەكە ڕادەستی پۆلیس نەكراوە.

 

باکگراوند: لە ساڵی 2017ـەوە دۆسیەی ئەمنیی كەركووك لە دەستی فەرماندەی ئۆپەراسیۆنەكاندایە كە لەلایەن تەحسین خەفاجییەوە سەرپەرشتی دەكرێت؛ ئێستاش هیچ هۆكارێك نییە بۆ ئەوەی پۆلیس دۆسییەكە وەرنەگرێتەوە.