ئیسرائیل هێرش دەکاتە سەر زیندانی ئێڤین لە تاران

ئاڤا نیوز 

 

ئیسرائیل هێرشی ئاسمانیی کردە سەر چەند ئامانجێک لە ناوەڕاستی تاران، لەنێویشیان زیندانی ئێڤین.

 

راگەیێنراوی فەرمی: ئیسرائیل کاتس، وەزیری بەرگریی ئیسرائیل ئەمڕۆ (دووشەممە) لە ئێکس نووسیی "ئێستا سوپای وڵاتەکەمان هێرشێکی بێوێنە لەدژی چەند ئامانجێکی ئێران لەنێو جەرگەی تاران دەکات، لەنێویاندا زیندانی ئێڤین و بارەگای ئاسایشی نیشتمانیی سوپای پاسداران."

 

زانیاریی زیاتر: زیندانی ئێڤین دەکەوێتە گەڕەکی ئێڤین لە تاران، لە ساڵی 1972 بنیاتنراوە و لەدوای ساڵی 1979ــشەوە لەگەڵ دروستبوونی کۆماری ئیسلامیی ئێران، ناوبانگێکی خراپی هەیە بەوەی بووەتە شوێنی زیندانیکردنی سیاسییەکان، رۆژنامەوان، کەسانی ئەکادیمیست و چالاکوانانی مافی مرۆڤ و بیانی. زیندانەکە گەورەیە و شوێنی 15 هەزار زیندانیی هەیە.

 

خوشکی زیندانیکراوێکی فەرەنسی: هێرشەکە ئیسرائیل نابەرپرسانەیە

 

نایۆمی کۆلەر، کچێکی فەرەنسییە کە خوشکەکەی لە زیندانی ئێڤین زیندانیکراوە. لەبارەی هێرشەکەوە بە ئاژانسی فرانس پرێسی گوت "ئەمە هێرشێکی نابەرپرسانەیە و ژیانی خۆشەویستانمان دەخاتە مەترسییەوە."

 

نایۆمی هەروەها دەڵێ "هیچ هەواڵێکمان پێنەگەیشووە، نازانین زیندانییەکان هێشتا زیندوون یان نا."

 
باکگراوند: ئیسرائیل ئەمڕۆ لە 11ـەمین رۆژی دەستپێکی جەنگەکەیدا لەگەڵ ئێران، هێرشەکانی بۆ سەر ئەو وڵاتە چڕتر کردەوە. میدیاکانی ئێران دەڵێن ئەمڕۆ ئیسرائیل لە وێستگەی فۆردۆی ئەتۆمیی داوەتەوە. ئیسرائیلیش دەڵێ بارەگای پاسداران و زیندانی ئێڤینی لە تاران کردووەتە ئامانج.