پێنج وڵاتی کەنداو بەهۆی هێرشی ئێران ئاسمانیان داخست

ئاڤا نیوز

هەریەکە لە قەتەر، عێراق، ئیمارات، کوەیت و بەحرەین بەهۆی هێرشەکانی ئێران بۆ سەر بنکە سەربازییەکانی ئەمریکا، ئاسمانی وڵاتەکانیان داخست و گەشتە ئاسمانییەکانیان ڕاگرت.

چیرۆکی سەرەکی: ئەمشەو ئێران هێرشی تۆڵەکردنەوەی بۆ سەر بنکە سەربازییەکانی ئەمریکا لە وڵاتانی کەنداو دەستپێکرد، سەرەتا بە 10 مووشەک هێرشی کردە سەر بنکەی عودەیدە لە قەتەر. دەگوترێت هێرش کراوەتە سەر بنکەی عەین ئەسەد لە پارێزگای ئەنباری عێراق، بەڵام تا ئێستا بەفەرمی پشتڕاست نەکراوەتەوە، لە ئاسمانی چەند وڵاتێکیش بەهۆی بینینی درۆن زەنگی ئاگادارکردنەوە لێ درا.

ڕاگەیێنراوە فەرمییەکان: هەریەکە لە حکومەتەکانی "قەتەر، عێراق، ئیمارات، کوەیت و بەحرەین" ڕایانگەیاند، بەهۆی مەترسیی هێرشە مووشەکییەکانی ئێران بۆ سەر بنکە سەربازییەکانی ئەمریکا، ئاسمانی وڵاتەکانیان بەڕووی گەشتە ئاسمانییەکان بۆ کاتێکی نادیار داخستووە. قەتەر و ئیمارات پێش دەستپێکردنی هێرشەکە ئاسمانیان داخست، وڵاتانی دیکەش دوای هێرشکردنە سەر قەتەر.

هەرچەندە لە سعوودیەش زەنگی ئاگادارکردنەوە لێ دراوە و سووریاش لە بنکە سەربازییەکانی ئەمریکا زەنگی ئاگادارکردنەوە لێ دراوە و سیستەمی بەرگریی ئاسمانی چالاک کراوە. حکومەتی سووریا  لە 13ی مانگەوە لە سەرەتای هێرشەکان گەشتە ئاسمانییەکانی ڕاگرتووە. عێراقیش لە سەرجەم فڕۆکەخانەکان گەشتە ئاسمانییەکانی ڕاگرتبوو جگە لە فڕۆکەخانەی بەسراە، ئەمشەو لەو فڕۆکەخانەیەش گەشتە ئاسمانییەکان داخران.

چی ڕووی دا: میدیا ئەمریکییەکان دەڵێن، ئێران شەش مووشەکی ئاراستەی قەتەر کردووە، سێ لە مووشەکەکان تێکشکێنراون و سێ مووشەکیش کەوتوونەتە خوارەوە. قەتەریش دەڵێت، بەرپەرچی مووشەکەکانیان داوەتەوە و هیچ زیانێکی گیانی نەبووە. میدیاکان پشتڕاستیان کردووەتەوە یەکێک لە مووشەکەکان ئامانجەکەی پێکاوە، یەکێک لە مووشەکەکانیش کەوتووەتە سەر زەوی، بەڵام نەتەقیوەتەوە.

ئەوەی پێشبینی دەکرێت: هاوکات، میدیای ئەمریکی لە زاری بەرپرسێکی کۆشکی سپی بڵاوی کردووەتەوە؛ پێشبینی دەکرێت ئێران هێرشێکی دیکەی مووشەکی بکاتە سەر وڵاتانی عێراق و بەحرەین.