وەزارەتی بازرگانی عێراق: هیچ دەروازەیەکی سنووری لەگەڵ ئێران دانەخراوە

ئاڤا نیوز

وەزارەتی بازرگانی عێراق بۆ ئاڤا ڕاستی بەرزبوونەوەی نرخی کاڵاوشمەک و داخستنی خاڵە سنوورییەکانی عێراقی لەگەڵ ئێراندا لەماوەی جەنگی نێوان ئیسرائیل و ئێران خستەڕوو.

چیرۆکی سەرەکی: دوای 12 ڕۆژ لە جەنگی نێوان ئیسرائیل و ئێران، بەرەبەیانیی ئەمڕۆ (بەکاتی هەولێر) دۆناڵد ترەمپ، سەرۆکی ئەمریکا ئاشکرای کرد، هەردوو وڵات ڕازی بوون بە ئاگربەست کە لە بەیانیی سێشەممە (کاتژمێر 07:30 بە کاتی تاران) دەکەوێتە بواری جێبەجێکردنەوە، زۆربەی وڵاتانیش پێشوازییان لەم هەنگاوە کرد.

لێدوانی فەرمی: محەممەد حەنون، وتەبێژی وەزارەتی بازرگانی عێراق بەئاڤا میدیای ڕاگەیاند: لەکاتی ململانێ و جەنگی نێوان ئیسرائیل و ئێراندا، وەزارەتی بازرگانی عێراق بەهەماهەنگی لەگەڵ وەزارەتی ناوخۆ و ئاسایشی نیشتمانی چاودێرییەکی چڕی بازاڕەکانی دەکرد، خۆشبەختانە هیچ سەرپێچییەک یاخود بەرزبوونەوەی نرخی خۆراک تۆمارنەکرا، جگە لە یەک یان دوو پارێزگا نەبێت کە نرخی ئاردیان هەندێک بەرزکردبووە، ئەویش بەپەلە ڕێوشوێنی پێویست گیرایەبەر و ئەو پرسە چارەسەر کرا.

- "دەتوانین بڵێین عێراق لە هێڵی پێشەوەی جەنگی نێوان هەردوو وڵات بووە، بەڵام پێشوەختە سەبەتەی خۆراکی هاووڵاتیانمان بەتایبەتی ئارد بۆ ماوەی شەش مانگ مسۆگەر کردبوو".

- لە ماوەی جەنگی نێوان ئیسرائیل و ئێراندا ئاڵوگۆڕی بازرگانی لەگەڵ ئێران لەسەرجەم دەروازە سنووریەکانەوە لەڕێگەی کەرتی تایبەت و کۆمپانیا بازرگانییەکانەوە نەوەستا و بەردەوام بوو و هیچ دەروازەیەکیش لەگەڵ ئێران دانەخرا وەک هەندێک لە دەزگاکانی ڕاگەیاندن بڵاویانکردەوە.